काठमाडौं। बैंकहरुमा ऋण थप सस्तिएको छ। लगानीयोग्य रकम (तरलता) थुप्रिएसँगै लागत कम गर्न निक्षेपको ब्याजदर घटाउँदा बैंकहरुको बेसरेट घटेपछि ऋण थप सस्तिएको हो।

वाणिज्य बैंकहरुले पछिल्लो तीन महिनाको औसत बेसरेटमा प्रिमियम जोडेर कर्जाको ब्याजदर निर्धारण गर्छन्। अधिकांश बैंकले बेसरेटमा ०.२५ प्रतिशतदेखि अधिकतम ५ प्रतिशतसम्म प्रिमियम जोड्ने गर्छन्।

बेसरेट भन्दा कममा बैंकहरुले ऋण लगानी गर्न पाउँदैनन्। प्रिमियम भने जोखिमका आधारमा कति तय गर्ने बैंकहरुमा निर्भर हुन्छ।

राष्ट्रिय वाणिज्य बैंकको बेसरेट सबैभन्दा कम ४.१७ प्रतिशतमा झरेको छ। बैंकले बेसरेटमा ०.५० देखि ३ प्रतिशतसम्म प्रिमियम जोडेर कर्जा दिइरहेको छ।

एनआइसी एसिया बैंकको बेसरेट ५.९१ प्रतिशत छ। साउन महिनाका लागि बैंकले बेसरेटमा ०.२५ देखि ३ प्रतिशतसम्म प्रिमियम जोडेर कर्जा दिइरहेको छ।