काठमाडौं। बैंकिङ प्रणालीमा लगानीयोग्य रकम थपिने क्रम निरन्तर बढेको छ। रेमिटेन्समा बढोत्तरीका कारण बैंकिङ प्रणालीमा तरलता निरन्तर थपिएको हो।

वाणिज्य बैंकहरुमा जेठ महिनामा मात्रै १ खर्ब १५ अर्ब रुपैयाँ तरलता थपिएको छ। जसका कारण वैशाखको तुलनामा जेठमा २० मध्ये १९ बैंकमा निक्षेप बढेको छ।

नेपाल एसबिआइ बैंकको निक्षेप १ अर्ब १७ करोडले खुम्चिएको छ। जेठमा ग्लोबल आइएमई बैंकमा सबैभन्दा धेरै १३ अर्ब ५६ करोड रुपैयाँ निक्षेप थपिएको छ।

जेठमा वाणिज्य बैंकहरुले ३६ अर्ब ३२ करोड रुपैयाँ कर्जा लगानी बढाएका छन्। कुमारी र एनआइसी एसिया बाहेक बैंकले कर्जा लगानी बढाएका हुन्। प्राइम कमर्सियल बैंकले सबैभन्दा धेरै ५ अर्ब ३२ करोड रुपैयाँले कर्जा लगानी बढाएको छ।

कुमारी बैंकको कर्जा भने ६ अर्ब १२ करोड रुपैयाँले खुम्चिएको छ।