काठमाडौं। काठमाडौं उपत्यका लगायत देशका प्रमुख सहरमा वायुप्रदूषण खतराको तह नजिक पुगेको छ। त्यसैले सरकारले सम्भव भएसम्म घरमै बस्न, कार्यालयका कामहरु घरबाटै व्यवस्थापन गर्न सके घरबाटै गर्न अनुरोध गरेको छ।
राष्ट्रिय विपद् जोखिम् न्यूनिकरण तथा व्यवस्थापन प्राधिकरणले सूचना जारी गर्दै आवश्यक भएमात्रै घरबाट बाहिर निस्किन भनेको हो।
प्राधिकरणले सवारी साधनको प्रयोग कम गर्न, घर, सडक तथा सार्वजनिक स्थानको सरसफाईमा ध्यान दिन, अत्याधिक धुलो र धुँवा उत्सर्जन गर्ने निर्माण कार्य केही समयलाई स्थगन गरी वातावरणमैत्री हुने गरी नियमन गर्न, फोहरमैलाको सही व्यवस्थापन गर्न एवं फोहरमैला नजलाउन, वन डढेलो लाग्नै नदिन र लागिहाले सावधानीपूर्वक नियन्त्रण गर्न पनि भनेको छ।
यस्तै, बालबच्चा, वृद्धवृद्धा र संवेदनशील स्वास्थ्य समस्या भएकाहरुको विशेष हेरचाह गर्न र प्रदूषण बढेको बेला घरबाहिर निस्कँदा सुरक्षित मास्कको प्रयोग गर्न प्राधिकरणले अनुरोध गरेको छ।
अहिले काठमाडौंको वायु विश्वकै सबैभन्दा प्रदूषित छ। एक्यूएयर अनुसार अहिले काठमाडौंको वायुको गुणस्तर २६९ रहेको छ। यो निकै अस्वस्थर मानिन्छ।
