काठमाडौं । काठमाडौं महानगरका प्रमुख प्रशासकीय अधिकृत सरोज गुरागाईं कमलादीस्थित महानगरको मुख्यालयमा पुगेका छन्।
महानगर प्रमुख बालेन्द्र सहले निर्माणधीन काठमाडौं टावरको नक्सा पास गरेको भन्दै गुरागाईंलाई काम गर्न रोकेका थिए। उनको कार्यकक्षमा नै ताला लगाइएको थियो।
प्रमुख प्रशासकीय अधिकृत नहुँदा महानगरका कर्मचारीहरुले करिब ३ महिनादेखि तलब पाएका थिएनन्। महानगरले अनुसन्धान चलिरहेको भन्दै निमित्त पठाउन केन्द्र सरकारलाई भनेको थियो।
आज गुरागाईं फेरि कार्यकक्ष प्रवेश गर्न कमलादी पुगेका थिए। उनलाई महानगर प्रहरीले रोक्ने प्रयास गरेको थियो। तर, नगर प्रहरीलाई धकेल्दै महानगरका कर्मचारीहरुले गुरागाईंलाई भवन भित्र लगे।
गुरागाईंलाई प्रवेश गराउन कर्मचारीसँगै काठमाडौं महानगरका वडा अध्यक्ष र कार्यपालिका सदस्यहरु पनि लागेका थिए।
भवनभित्र प्रशासकीय अधिकृतको कार्यालषमा तालाबन्दी गरिएको थियो। कर्मचारीहरुले ताला फोडेर गुरागाईंलाई प्रवेश गराउने प्रयास गरिरहेका छन्।
उपप्रमुख सुनिता डंगोल पनि त्यहाँ उपस्थित थिइन्। सुनिताले भने तोडफोड नगर्न आग्रह गरेका थिए।
नगर प्रहरीले भने कार्यकक्षको ढोका खोल्न रोकेका छन्।
