काठमाडौं । प्रतिनिधिसभाका निलम्बित सांसद तथा राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो निलम्बन फुकुवा गरिदिन सभामुख देवराज घिमिरेलाई आग्रह गरेका छन्।
आज रास्वपा सांसदहरुको टोली नै लिएर लामिछाने घिमिरेालाई भेट्न पुगेका थिए। घिमिरेले भने कानुनी आधारमा लामिछाने निलम्बन भएको जवाफ फर्काएका थिए।
‘मैले सूचना मात्रै जारी गर्ने हो। अहिलेको कानुनी व्यवस्थामा जे छ त्यहि भएको हो। रास्वपा र लामिछानेप्रति मेरो कुनै पूर्वाग्रह छैन भन्नुभयो,’ भेटमा भएको छलफलबारे सभामुखका संचार विज्ञ शेखर अधिकारले भने।
लामिछानेले आफूलाई सरकारले कानुनको दुरुपयोग गरेर निलम्बन गराएको दाबी गरेका थिए। सिंहदरबारस्थित घिमिरेको कार्यकक्षमा पुगेका लामिछानेले सरकाले गरिरहेको कानुन दुरुपयोग रोक्न घिमिरेलाई आग्रह गरेका थिए।
सहकारीको रकम हिनामिनामा जोडिएको आरोप लागेका लामिछानेलाई सहकारी ठगी, सम्पत्ति शुद्धिकरण र संगठीत अपराधमा अभियोग दायर भएपछि संसद सचिवालयले पुस ८ गते निलम्बन भएको सूचना जारी गरेको थियो। सम्पत्ति शुद्धिकरण निवारण ऐन २०६४ अनुसार मुद्दा किनारा नलागेसम्म पद निलम्बन हुने व्यवस्था छ।
रविको सो मुद्दा अदालतमा विचाराधिन नै छ।
