काठमाडौं। हिमालयन डिष्टिलरीले लाभांश घोषणा गरेको छ। कम्पनीको सञ्चालक समितिको आइतबार बसेको बैठकले सेयरधनीलाई २० प्रतिशत प्रतिफल वितरण गर्ने निर्णय गरेको हो।
सेयरधनीले कम्पनीको आर्थिक वर्ष २०८०/८१ को मुनाफाबाट चुक्ता पुँजीको १५ प्रतिशत बोनस सेयर र करसहित ५ प्रतिशत नगद लाभांश पाउनेछन्।
कम्पनीको चुक्ता पुँजी २ अर्ब ६७ करोड २५ लाख रुपैयाँ छ। कम्पनीले पुस २८ गते साधारण सभाको मिति तोकेको छ। साधारण सभाबाट पारित भएपछि सेयरधनीले लाभांश पाउनेछन्।
साधारण सभा र लाभांश वितरण प्रयोजनका लागि कम्पनीले पुस १९ गते बुक क्लोज तोकेको छ। बुक क्लोजअघि कायम सेयरधनीले प्रतिफल पाउनेछन्।
हिमालयन डिष्टिलरीले आर्थिक वर्ष २०७९/८० मा १५ प्रतिशत नगद र १० प्रतिशत बोनस सेयर वितरण गरेको थियो। यस्तै, २०७८/७९ मा १० प्रतिशत नगद र ६० प्रतिशत बोनस सेयर वितरण गरेको थियो।
