काठमाडौं। आइपीओ निष्कासनपछि नेपाल स्टक एक्सचेन्ज (नेप्से) मा सूचीकृत हुने कम्पनीको ओपनिङ रेन्ज घटाउने प्रस्ताव ८ महिनादेखि नेप्सेको सञ्चालक समितिमा अड्किएको छ।
आइपीओ निष्कासनपछि दोस्रो बजारमा पहिलो कारोबारका लागि प्रदान गरिने मूल्य घटाउने प्रस्ताव नेप्सेको नेतृत्वले नचाहेका कारण अघि बढ्न नसकेको हो।
नेप्से व्यवस्थापनले नयाँ सूचीकृत कम्पनीको पहिलो कारोबार मूल्य घटाउने प्रस्ताव गत मंसिरमै सञ्चालक समितिमा पेस गरेको थियो। तर, सञ्चालक समितिले प्रस्तावमाथि छलफल नै गर्न चाहेको छैन।
आइपीओ निष्कासन गरेर दोस्रो बजारमा कारोबार गर्ने सबै कम्पनीलाई नेप्सेले अहिले नेटवर्थको तीन गुणासम्म ओपनिङ रेन्ज प्रदान गर्दै आएको छ। सोही अनुसार कम्पनीको पहिलो कारोबार सुरु हुन्छ।
खराब वित्तीय अवस्था भएका कम्पनीमा लगानीकर्ता फस्ने जोखिम रहेको विश्लेषणसहित नेप्सेले ओपनिङ रेन्ज घटाउन प्रस्ताव गरेको थियो। तर, अध्यक्ष शोभाकान्त पौडेलले यसमा प्रवेश गर्न चाहेका छैनन्।
‘अध्यक्ष पौडेलले कम्पनीको ओपनिङ रेन्ज परिमार्जन गर्ने निर्णय गर्न चाहेका छैनन्,’ स्रोतले भन्यो, ‘विवादमा पर्ने डरले उनले प्रस्तावमाथि छलफल नै नगराएका हुन्।’
नेप्सेले प्रिमियम मूल्य वा बुक बिल्डिङमार्फत सेयर जारी गर्ने कम्पनीलाई सोही मूल्यमा प्रथम कारोबार गराउने प्रस्ताव गरेको थियो।
त्यस्तै, अंकित मूल्यमा सेयर निष्कासन गर्ने कम्पनीलाई न्यूनतम सीमा अंकित मूल्य र अधिकतम सीमा अंकित मूल्यको १.५ गुणा कायम गरी लगानीकर्तालाई कारोबार प्रणालीमा खरिद तथा बिक्री आदेश प्रविष्ट गर्न दिने व्यवस्था गर्नुपर्ने प्रस्ताव गरेको थियो।
त्यसपछि लगानीकर्ताको खरिद तथा बिक्रीबाट कायम हुने मूल्यलाई पहिलो मूल्य मानेर कारोबार सञ्चालन गर्ने व्यवस्था गर्न प्रस्ताव गरिएको थियो।
ओपनिङ रेन्ज धेरै हुँदा लगानीकर्ता मारमा परेको निष्कर्षसहित नेप्सेले घटाउन चाहेको हो। ‘प्रथम कारोबार मूल्य घटाउने खालको निर्णय आवश्यक छ। तर, सञ्चालक समितिबाट निर्णय हुने कुनै छेकछन्द छैन,’ नेप्सेका एक अधिकृतले भने।
सेयर बजारको नियामक नेपाल धितोपत्र बोर्ड हो। बोर्डले वित्तीय विवरण नहेरी आइपीओ निष्कासनको अनुमति दिंदै आएको छ। त्यही भएर खराब अवस्था भएका कम्पनीमा लगानीकर्ता फसिरहेका छन्।
नेप्सेका सूचना अधिकारी मुराहरि पराजुलीले सूचीकृत कम्पनीको ओपनिङ रेन्ज घटाउने कुरा उठे पनि निर्णय नभएको बताए। ‘कम्पनीको ओपनिङ रेन्जका विषयमा पहिले नै छलफल भएको हो। तर, अहिलेसम्म निर्णय केही भएको छैन,’ उनले भने।
अहिले प्रिमियम, बुक बिल्डिङ विधि र अंकित मूल्यमा आइपीओ निष्कासन गर्ने कम्पनीको ओपनिङ रेन्ज एउटै छ।
बुक बिल्डिङ विधिमार्फत पहिलोपटक सर्वोत्तम सिमेन्टले गत चैतमा आइपीओ निष्कासन गर्नुअघि ओपनिङ रेन्जका विषयमा अन्योल थियो। नेप्सेको सञ्चालक समितिले निर्णय नगर्दा नेटवर्थको तीन गुणा मूल्य तय गरिएको थियो। जसका कारण प्रति कित्ता ३६०.९० रुपैयाँमा आइपीओ निष्कासन गरेको सर्वोत्तम सिमेन्टको पहिलो कारोबार ५५६ रुपैयाँमा भएको थियो।
नेप्से सञ्चालक समितिका अध्यक्ष पौडेल कम्पनीको ओपनिङ रेन्जका विषयमा कुरा उठे पनि खुला बजारले नै मूल्य निर्धारण गर्ने बताउँछन्। ‘कम्पनीको ओपनिङ रेन्ज घटाउने विषय उठेको हो। तर, प्रस्ताव आएको छैन। खुला बजारमा प्रतिस्पर्धामार्फत नै मूल्य तय हुने हो,’ उनले भने।
