काठमाडौं । राष्ट्रिय स्वतन्त्र पार्टीका सभापति रवि लामिछाने पक्राउ परेका छन्। प्रहरीले बुढानीलकण्ठस्थित लामिछानेको घरबाटै उनलाई नियन्त्रणमा लिएको हो।
सहकारी बचत रकम हिनामिना मुद्दामा उच्च अदालत तुलसीपुरको बुटवल इजलासले रविलाई पुर्पक्षका लागि थुनामा पठाउने आदेश शुक्रबार गरेको थियो। रुपन्देही जिल्ला अदालतको आदेश बदर गर्दै उच्चले रविलाई थुनामै राखेर मुद्दाको पुर्पक्ष गर्न आदेश दिएको थियो। आदेशलगत्तै रवि पक्राउ परेका हुन्।
रविलाई नियन्त्रणमा लिन काठमाडौं उपत्यका अपराध अनुसन्धान कार्यालयको टोली रविको घरमा पुगेको थियो। घरबाटै प्रहरीले रविलाई नियन्त्रणमा लिएको हो। रविलाई आज जिल्ला प्रहरी परिसर काठमाडौंमा राखिनेछ।
उच्च अदालतका न्यायाधीश रमेश ढकाल र स्वीकृति पराजुलीको इजलासले जिल्ला अदालत रुपन्देहीको आदेश बदर गर्दै रविलाई थुनामा पठाउन आदेश गरेको हो।
बुटवलको सुप्रिम सहकारी ठगी र संगठित अपराध मुद्दामा जिल्ला अदालतले एक करोड रुपैयाँ धरौटी मागेपछि रवि आफैं गत फागुन २८ गते उच्च अदालत गएका थिए। लामिछाने अदालतको आदेश पालना गर्दै आफू अन्यायमा परेको दुनियाँको अन्य ढोका ढकढकाउने प्रतिक्रिया दिएका छन्।
गोर्खा मिडियाका अर्का संचालक पूर्वडीआइजी छविलाल जोशीलाई भने जिल्ला अदालतले पुर्पक्षका लागि थुनामा पठाएको थियो।
जिल्ला अदालतको आदेश चित्त नबुझेपछि जोशी पनि उच्च अदालत गएका थिए। उच्च अदालतले जोशीको हकमा जिल्ला अदालतको आदेश सदर गरेको छ।
विभिन्न ४ जिल्लामा मुद्दा दायर भएपछि जिल्ला अदालतको आदेश अनुसार धरौटी बुझाएर थुनामुक्त भएका रवि साढे ४ महिनापछि गत सोमबार पार्टी कार्यालय गएका थिए। उनले त्यस दिन पार्टीको केन्द्रीय समिति बैठकको अध्यक्षता समेत गरेका थिए। रवि शनिबार चितवनको कार्यक्रममा जाने तालिका थियो।
उच्चको आदेशविरुद्ध रविले सर्वोच्चमा निवेदन दिन सक्नेछन्।
