काठमाडौं। एनआइसी एसिया बैंकले बैसाखको पहिलो साता ५० करोड रुपैयाँको ऋणपत्र ल्याउने भएको छ । ऋणपत्रको बिक्री प्रबन्धक नबिल इन्भेष्टमेन्ट बैंकिङका प्रमूख कार्यकारी अधिकृत प्रविनरमण पराजुलीले भने, ‘ धितो बोर्डबाट अनुमति पाइसकेको छ भने कम्पनी रजिष्ट्रार कार्यालय र नेपाल राष्ट्र बैंकमा अनुमति लिने प्रक्रिया अघि बढिसकेको छ ।’
धितोपत्र बोर्डले गत १९ गते निष्कासन अनुमति दिएको यो ऋणपत्रको बार्षिक व्याजदर ७.२५ रहेको छ । यो व्याजको भुक्तानी अर्धबार्षिक रुपमा हुने छ । अंकित मूल्य एक हजार रुपैयाँ रहने यो ऋणपत्रको म्याचुरिटी अवधि सात बर्षको हुने छ । यस ऋणपत्रको निष्कासन तयारी नेपाल इण्डष्ट्रियल एण्ड कमर्स बैंक र बैंक अफ एसिया बीच मर्जर अगावै भएको थियो । मर्जर लगायतको कारण निष्कासनको समय केही पछि धकेलिएको ऋणपत्रले क्रेडिट रेटिङ एजेन्सी इक्रा नेपालबाट एल ए माइनस (एलए -) रेटिङ पाएको थियो । इक्रा नेपालका प्रमूख कार्यकारी अधिकृत दिपकराज काफ्लेका अनुसार ऋणपत्रको रेटिङ पुर्नमूल्यांकन भइसकेको र सोही रेटिङ नै कायम रहेको छ । एलए माइनस रेटिङले समयमै भुक्तानी हुने र न्युन जोखिम युक्त रहेको जनाउँछ । 
