काठमाडौं। कर्णाली याक्सले जनकपुर बोल्ट्सलाई हराएको छ। नेपाल प्रिमियर लिग (एनपीएल) अन्तर्गत आज सम्पन्न दोस्रो खेलमा कर्णालीले जनकपुरलाई १९ रनले हराएको हो।
कीर्तिपुरस्थित टीयू क्रिकेट मैदानमा टस हारेर ब्याटिङमा उत्रिएको कर्णालीले अरिफुल इस्लामको ४३ रनको सहायतामा १३३ रनको सामान्य लक्ष्य प्रस्तुत गरेको थियो। उसले निर्धारित २० ओभरमा ९ विकेट गुमाउँदै बोर्डमा १३२ रन जोडेको थियो।
जवाफी ब्याटिङमा उत्रिएको जनकपुरले भने त्यही लक्ष्य पनि भेट्टाउन सकेन। उसका लागि अभिषेक तिवारीले सर्वाधिक २० तथा मोइन अली र हरमीत सिंहले समान १९ रन बनाए।
घातक बलिङ गर्ने क्रममा हुसैन तलत र युनिस विक्रम ठकुरीले समान ३ विकेट लिँदा नन्दन यादवले २ तथा सोमपाल कामीले १ विकेट लिए।
त्यसअघि ब्याटिङमा उत्रिएको कर्णालीले निर्धारित २० ओभरमा ९ विकेट गुमाउँदै १३२ रन बनाएको थियो।
टस हारेर ब्याटिङमा उत्रिएको कर्णालीलाई सुरुबाटै जनकपुरका बलरले दबाबमा राखे। यसक्रममा अरिफुल इस्लामले सर्वाधिक ४३, पवन सर्राफले ३७ र दीपक डुम्रेले १३ रन बनाए।
घातक बलिङ गर्ने क्रममा कप्तान हरमित सिंहले सर्वाधिक ३ विकेट लिए। अघिल्लो सिजन सुदूरपश्चिमबाट खेलेका सिंहले यसपालि जनकपुरको कप्तानी सम्हालिरहेका छन्।
जनकपुरको सरप्राइज खेलाडीका रुपमा १६ वर्षिय राहुल यादव रहे। उनले आफ्नो ४ ओभर बलिङ गर्दै मात्रै १५ रन दिएर २ विकेट लिए।
त्यस्तै, विश्व क्रिकेटमा चर्चित अलराउण्डर मोइन अलीले पनि २ विकेट लिए। महँगो बनेका ललित राजवंशीको नाममा १ विकेट रह्यो।
बुधबार एनपीएलमा एउटैमात्र खेलछ। उद्घाटन खेलमा लुम्बिनी लायन्ससँग पराजय ब्यहोरेको सुदूरपश्चिम रोयल्सले भोलि पोखरा एभेन्जर्सलाई चुनौती दिनेछ।
