काठमाडौँ । लेन्दे खोलामा बाढी जाँदा रसुवा भन्सार नाकामा ठूलो क्षति पुगेको छ। अविरल वर्षासँगै गएको बाढीले नाका क्षेत्र तहसनहस बनाएको स्थानीयले बताएका छन्।
रसुवाका सहायक सिडिओ ध्रुव प्रसाद अधिकारीले टिमुरे र सँगैको अर्को एउटा बजार तहसनहस भएको जानकारी दिए।। रसुवा भन्सार क्षेत्रमा ठूलो सङ्ख्यामा गाडीहरू र अन्य सामग्रीहरू थिए।
बाढीले ती सबै सामग्रीहरू बगाएको रसुवाका प्रमुख भन्सार अधिकृत राजेन्द्र ढुंगानाले जानकारी दिए।
‘बाढीले ठूलो क्षति गरेको छ। बजार र भन्सार पुरै बगाएको छ। हामी अहिले जङ्गलमा बसिरहेका छौं । अस्ति भर्खर निर्माण गरेको पुल पनि बगेको छ।’ उनले भने।
सहायक सिडिओ अधिकारीले बाढी निकै ठूलो भएको भन्दै रसुवा, धादिङ र नुवाकोट क्षेत्रको तटीय क्षेत्रमा सतर्कता अपनाउनुपर्ने बताए।
‘तटीय क्षेत्रमा अहिले नै सतर्कता अपनाउनुपर्ने देखिन्छ,’ उनले बिजमाण्डूलाई भने।
राष्ट्रिय जोखिम न्यूनिकरण तथा व्यवस्थापन प्राधिकरणले पनि सूचना जारी गर्दै भोटेकोशी नदीमा बाढी/पानीको बहाब उच्च रहेकोले रसुवा, नुवाकोट, धादिङ, गोरखा र चितवन जिल्ला भै बग्ने नदी तटीय क्षेत्रका बासिन्दालाई शतर्कता अपनाई सुरक्षित स्थानमा बस्नु हुन अनुरोध गरेको छ।
