काठमाडौं। पूर्वअर्थमन्त्री एवं एमाले उपाध्यक्ष विष्णु पौडेलको हिरासत बसाइ लम्बिएको छ। विशेष अदालतले पौडेललाई सम्पत्ति शुद्धीकरणको मुद्दामा अनुसन्धानका लागि हहिहरासतमा राख्न तेस्रो पटक ६ दिनको म्याद दिएको छ।
दोस्रो पटक दिइएको ३ दिनको म्याद सकिएपछि विभागले पौडेललाई बिहीबार अदालतमा उपस्थित गराएको थियो।
अदालतका सदस्यहरु हेमन्त रावल, डिल्लीरत्न श्रेष्ठ र उमेश कोइरालाको संयुक्त इजलासले थप ६ दिन हिरासतमा राख्न आदेश दिएको हो।
सम्पत्ति शुद्धीकरण लगायत विभिन्न कसुरमा पुर्पक्षका लागि थुनामा रहेका विवादास्पद व्यापारी दीपक भट्टसँग कारोबार देखिएपछि पौडेललाई असार ८ गते सुर्खेतबाट पक्राउ गरेर माइक्रोबसमा रातारात काठमाडौं ल्याइएको थियो।
पौडेललाई रिहा गर्न माग गर्दै उनकी पत्नीले सर्वोच्च अदालतमा दायर गरेको बन्दीप्रत्यक्षीकरणको रिटमा भने सुनुवाई भइरहेको छ।
