काठमाडौं। घर बनाउन चाहनेहरुका लागि बैंकहरुले आकर्षक अफर ल्याएका छन्। ब्याजदर निरन्तर घटिरहेका बेला बैंकहरुले ६ प्रतिशतसम्मको स्थिर ब्याजदरमा घर कर्जा दिने स्किम ल्याएका छन्।

ऋणको माग अपेक्षाकृतरुपमा बढ्न नसकेका बेला ब्याजदर घटाएर स्थिर ब्याजदरको घर कर्जाको स्किम ल्याएको बैंकरहरुले बताएका छन्।

नेपाल बैंकले सबैभन्दा न्यून स्थिर ब्याजदरमा घर कर्जा स्किम ल्याएको छ। बैंकले ६.३१ प्रतिशत स्थिर ब्याजदरमा २५ वर्ष अवधिकोसम्मको स्किम ल्याएको हो।

ग्लोबल आइएमई, एनएमबि, नबिल, एभरेष्ट, सिटिजन्स, एनआइसी एसिया, कुमारी, हिमालयन र राष्ट्रिय वाणिज्य बैंकले समेत १० प्रतिशत तलको स्थिर ब्याजदरमा घर कर्जा प्रवाह गरिरहेका छन्।

ग्लोबल आइएमई बैंकले ६.८८ प्रतिशत स्थिर ब्याजदरमा घर कर्जाको स्किम सार्वजनिक गरेको छ। यो स्किम बैंकले वैशाख मसान्तसम्मका लागि ल्याएको हो।

नबिल बैंकले ७.९९ प्रतिशत स्थिर ब्याजदरमा ७ वर्ष अवधिको कर्जा दिइरहेको छ। अधिकांश बैंकले एकल अंकको स्थिर ब्याजदरमा घर कर्जा दिइरहेका छन्।

चालु आर्थिक वर्ष ८ महिनामा वाणिज्य बैंकहरुले ६ अर्ब ४४ करोड रुपैयाँ घर कर्जा प्रवाह गरेका छन्।

नेपाल एसबिआई बैंकको घर कर्जाको स्थिर ब्याजदर सबैभन्दा धेरै छ। यो बैंकले १२ प्रतिशत स्थिर ब्याजदरमा घर कर्जा प्रवाह गरिरहेको छ।

पछिल्लो समय बैंक तथा वित्तीय संस्थाहरूले प्रदान गर्ने कर्जाको ब्याजदर निरन्तर घट्दो क्रममा छ। ब्याजदर निरन्तर घट्दा पनि अपेक्षाअनुसार कर्जाको माग बढ्न सकेको छैन।

कुन बैंकले कति ब्याजदरमा दिंदैछन् घर कर्जा ?

नेपाल बैंकका प्रमुख कार्यकारी अधिकृत (सीइओ) तिलकराज पाण्डेय अन्य कर्जाको तुलनामा होम लोन बढी सुरक्षित हुने भएकाले न्यून स्थिर दरमा स्किम ल्याएको बताउँछन्।

‘रियल सेक्टरको लोनको तुलनामा होम लोनको पोर्टफोलियो धेरै नै कम छ,’ उनले भने, ‘होम लोन राष्ट्र बैंकको प्राथमिकतामा पनि पर्छ। ब्याजदर घट्दो क्रममा रहेको अवस्थामा रियल इस्टेटमा डिमान्ड बढाउन बजारमा प्रचलनमा रहेकोभन्दा कम स्थिर ब्याजदरमा होम लोनको स्किम ल्याएका हौं।’

उनका अनुसार न्यून ब्याजदरको स्किमले होम लोनको पोर्टफोलियो बढाउन बैंक सफल भइरहेको छ। नेपाल बैंकले असारयता घर कर्जा साढे ११ प्रतिशतले बढाएको छ।

स्थिर ब्याजदरको आकर्षक अफरका कारण ग्लोबल आइएमई बैंकले घर कर्जा १६.६७ प्रतिशतले विस्तार गरेको छ।

तर, स्थिर ब्याजदरका बाबजुद आधा बैंकले घर कर्जा अपेक्षा अनुसार बढाउन सकिरहेका छैनन्। ९ वटा बैंकको घर कर्जा घटेको छ। कतिपय बैंकले ब्याजदर सस्तो भएपनि पुँजीकोषमा दबाबका कारण घर कर्जा बढाउन नसकेका हुन्।

प्रभु बैंकका डेपुटी सीइओ मणिराम पोखरेलले स्थिर ब्याजदरको ऋण अपेक्षा अनुसार माग नभएको बताए।

‘पछिल्लो समय कर्जाको ब्याजदर निरन्तर घट्दो क्रममा छ। त्यस कारण पनि स्थिर ब्याजदरमा त्यति आकर्षण देखिएको छैन,’ उनले भने, ‘ऋणीले पछिका लागि भन्दा पनि अहिलेकै लागि सोच्ने रहेछन्। हामीले स्थिर ब्याजदर तोकेका छौं। तर, कर्जा अपेक्षाजनक रुपमा गएको छैन।’

प्रभु बैंकको घर कर्जाको स्थिर ब्याजदर अवधि अनुसार ९.९९ प्रतिशतदेखि ११.९९ प्रतिशतसम्म छ।

चालु वर्ष घर कर्जा कुन बैंकले कति प्रवाह गरे ?