सनराइजर्स हैदराबाद फेरि पराजित भएको छ। इण्डियन प्रिमियर लिग (आईपीएल) अन्तर्गत आज सम्पन्न पहिलो खेलमा दिल्ली क्यापिटल्सले हैदराबादलाई ७ विकेटले हराएको हो।
विशाखापटनमस्थित राजशेखर रेड्डी स्टेडियममा टस जितेर ब्याटिङमा उत्रिएको हैदराबादले १८.४ ओभरमा अलआउट हुँदै १६३ रन बनाएको थियो। हैदराबादका लागि अनिकेत वर्माले सर्वाधिक ७४ रन बनाउँदा हेनरिच क्लासनले ३२ तथा ट्राभिस हेडले २२ रन बनाए।
बलिङतर्फ हैदराबादको ब्याटिङ ध्वस्त पार्न मिचेल स्टार्कको विशेष भूमिका रह्यो। उनले सर्वाधिक ५ विकेट लिँदा कुलदीप यादवले ३ र मोहित शर्माले १ विकेट लिए।
जवाफी ब्याटिङमा उत्रिएको दिल्ली ४ ओभर बाँकी छँदै ३ विकेट गुमाएर लक्ष्य भेट्टायो। दिल्लीका लागि फाफ डुप्लिसिसले सर्वाधिक ५० रन बनाउँदा जेक फ्रेसरले ३८ र अभिषेक पोरलले अविजित ३४ रन बनाए।
बलिङतर्फ हैदराबादका जिसन अन्सारीले ३ विकेट लिए।
जारी सिजन ३ खेल खेलेको हैदराबादको यो दोस्रो हार हो। पहिलो खेलमा राजस्थानलाई हराएको हैदराबादले दोस्रो खेलमा लखनउसँग पराजय ब्यहोरेको थियो। अर्कोतर्फ दिल्लीले लखनउलाई हराउँदै प्रतियोगितामा सुखद सुरुवात गरेको थियो। आजै हुने अर्को खेलमा चेन्नइ सुपर किंग्स र राजस्थान रोयल्स प्रतिस्पर्धा गर्दैछन्।
