काठमाडौं। राजावादीले चैत १५ गते हिंसात्मक प्रदर्शन गरेपछि त्यसले सिजनको मुखमै पर्यटन क्षेत्रमा धक्का लागेको छ
व्यवसायीहरुका अनुसार नेपाल भ्रमणका लागि होटल, ट्राभल, ट्रेकिङ बुकिङ गरेका पर्यटकहरुले धमाधम रद्द गर्न थालेका छन्।
नेपाल एसोसिएसन अफ टुर एण्ड ट्राभल एजेन्ट्स (नाट्टा)का अध्यक्ष कुमारमणि थपलियाले शुक्रबारको प्रदर्शनको नकारात्मक सन्देश विश्वभर पुगेको बताए।
‘प्रदर्शनका क्रममा भएको तोडफोड र आगजनीले विश्वभर नै नकारात्मक सन्देश गएको छ,’ उनले भने, ‘नेपाल आउनका लागि यसअघि बुकिङ गराएका पर्यटक त्रसित देखिएका छन्। उनीहरुले नेपालको अवस्थालाई देखाएर धमाधम बुकिङ रद्द गर्न थालेका छन्।’
राजावादीको प्रदर्शनका क्रममा २ जनाको ज्यान गएको थियो। प्रदर्शनकारीले तोडफोड, आगजनी र लुटपाट गरेका थिए। यसले पर्यटकहरुमा नेपाल सुरक्षित छैन भन्ने सन्देश गएको व्यवसायीहरुको भनाइ छ।
अष्ट्रेलियाले आफ्ना नागरिकलाई नेपाल भ्रमण नगर्न ट्राभल एडभाइजरी नै जारी गरेको छ।
होटल संघ नेपाल (हान)का अध्यक्ष विनायक शाहले पनि होटलमा पर्यटकहरुले बुकिङ रद्द गर्न थालेको बताए। ‘पर्यटन क्षेत्र आफैंमा अति संवेदनशील क्षेत्र हो। सानो बस दुर्घटना हुँदा त प्रभाव पर्छ। अस्तिको घटनालाई लिएर पर्यटकहरु डराएका छन्। यस्तो बेला नेपाल भ्रमण गर्दा जोखिम हुने भन्दै उनीहरुबाट क्यान्सिलेसन आउन थालेको छ,’ शाहले भने।
ट्रेकिङ एजेन्सिज एसोसिएसन अफ नेपालका अध्यक्ष सागर पाण्डेले पर्यटकहरुबाट नेपालको अवस्थालाई लिएर धमाधम इन्क्वाइरी आइरहेको जानकारी दिए। ‘पर्यटकहरुबाट इन्क्वाइरी बढेको छ। केहीले बुकिङ रद्द गरेका छन्,’ उनले भने।
पर्यटकहरुले नेपाल भ्रमणको योजना रद्द गर्न थालेकाले यस्तो बेला पर्यटन बोर्डले आफ्नो भूमिका देखाउनुपर्ने व्यवसायीहरुको भनाइ छ। अन्यथा पर्यटन क्षेत्र चौपट हुने डर उनीहरुमा छ।
‘एक त हवाई भाडादर महङ्गो छ। फेरि सिजनकै समयमा अराजक गतिविधि भइदियो,’ होटल संघका अध्यक्ष शाहले भने, ‘त्यसैले पर्यटन बोर्डले सकारात्मक सन्देश प्रवाह गर्न ढिलो गर्नु हुँदैन।’
वायुसेवा सञ्चालक संघका अध्यक्ष मनोज कार्कीले पनि घुम्नका लागि नेपाल सुरक्षित रहेको सन्देश प्रवाह गर्नुपर्नेमा जोड दिए।
राजावादीको प्रदर्शनका क्रममा चैत १५ गते ४५ मिनेट त्रिभुवन विमानस्थल नै ठप्प हुन पुगेको थियो। धुवाँका कारण जहाज आकाशमै होल्ड भएका थिए।
पर्यटन बोर्डका निर्देशक मणि लामिछानेले शुक्रबारको आन्दोलनले लक्जरियस टुरमा आउने पर्यटक बढी प्रभावित हुने बताए। उनी पनि व्यवसायीहरु झैं सकारात्मक सन्देश दिन आवश्यक रहेकामा सहमत छन्।
‘शुक्रबारको हिंसात्मक प्रदर्शनले नकारात्मक सन्देश गएको छ। पर्यटकहरु घुम्न आउनका लागि डराएका छन्। त्यसैले अब पर्यटन क्षेत्रले यो विषयमा सकारात्मक सन्देश प्रवाह गर्न आवश्यक छ,’ उनले भने।
