काठमाडौं। नेपाल सुपर लिग (एनएसएल)मा आज बुटवल लुम्बिनी एफसी र झापा एफसी आमनेसामने हुँदैछन्। शनिबारबाट सुरु भएको लिगमा आज बुटवल र झापा आमनेासामने हुनेछन्।

त्रिपुरेश्वरस्थित दशरथ रंगशालामा साँझ ६ बजे खेल सुरु हुनेछ। आयोजक नेपाल स्पोर्ट्स म्यानेजमेन्टले विद्यार्थीलाई आधा छुटको व्यवस्था गरेको छ। आजको टिकट मूल्य ३ सय र ६ सय रुपैयाँ तोकिएको छ। उद्घाटन खेलमा यो शुल्क साधारणतर्फ ४ सय र भीआईपीतर्फ ८ सय रुपैयाँ तोकिएको थियो।

झापा एफसीको अघिल्लो संस्करणमा इन्ट्री प्रभावशाली रहेन। यस्तोमा परिवर्तन अपरिहार्य भन्दै झापाले लोगोदेखि लिएर सबै कुरा परिवर्तन गरेको छ। झापाका मार्की खेलाडीदेखि प्रशिक्षकसम्म फेरिएका छन्। छिरिङ लामालाई मात्र झापाले यसपाला रिटेन गरेको थियो। त्यस्तै अर्का खेलाडी लाकेन लिम्बू मार्की खेलाडी छन्।

लामासँगै झापासँग ‘ए’ समूहका आशिष गुरुङ र एक एनआरएन खेलाडी छन्। त्यस्तै, ‘बी’ समूहका अविनाश स्याङ्तान, दीपेश धिमाल, अञ्जल श्रेष्ठ, रोशन पहारी, दीपेन्द्र विके र उज्वल राई छन्। ‘सी’ समूहबाट सृजन दानी, एरोन थापा, श्याम मुर्मु र अभिषेक गुरुङ झापा पुगेका छन्। त्यस्तै विभिन्न देशमा खेलिहरेका रितिक खड्का र आर्यन राई पनि झापासँग एनआरएन र रुकी खेलाडीका रुपमा छन्।

झापाले विदेशी खेलाडीका रुपमा मोहम्मद इसाइभलाई अनुबन्धन गरेको छ। त्यस्तै, सर्वियन फुटबलर लेजर आर्सिच र नाइजेरियन स्ट्राइकर अल्हाजी गेरो र गोलकिपर नेमान्जा लेमाजिक पनि झापामा अनुबन्धित भएका छन्।

अर्कोतर्फ, एनएसएल अक्सनमा सबैभन्दा कम खर्च गर्ने टोली बनेको थियो बुटवल लुम्बिनी एफसी। बुटवलले एरिक विष्ट, प्रदीप लामा र दीप कार्कीलाई ‘ए’ समूहबाट लिँदा कसैमा उच्चतम ४ लाख खर्चिएन। बुटवलको मार्की खेलाडीमा मनिष डाँगी छन् भने प्रशिक्षकमा पुष्पलाल शर्मा छन्।  बुटवलले १७ लाख ५० हजार रुपैयाँ खर्च गर्दा ४ लाख ५० हजार रुपैयाँ उबार्‍यो।

बुटवलसँग ‘बी’ समूहका निराजन धामी, सरोज तामाङ, फत्तेमान घले, विमल पाण्डे, टिकेन्द्रसिंह थापा र सन्दीप कार्की छ। त्यस्तै ‘सी’ समूहका सुमन श्रेष्ठ, निङसाङ लिम्बू, खेमराज श्रेष्ठ र मनिष सेढाइ बुटवलमा ड्राफ्ट भएका छन्।

बुटवलले विदेशी खेलाडीमा अनुभवी र पुराना खेलाडीलाई प्राथमिकता दिएको छ।

वेस्टहम युनाइटेडको एकेडेमीबाट करियर सुरु गरेका डिफेन्डर नाथन माभिला बुटवल पुगेका छन्। जोर्डनमा छँदा आफ्नो टोली अल-फैसलीलाई च्याम्पियन बनाएका उनी डिफेन्स र आक्रमण दुवैमा राम्रो गर्नसक्ने खेलाडी हुन्।

त्यस्तै स्कटल्याण्डका अनुभवी मिडफिल्डर फ्रयाङ रोसलाई पनि बुटवलले अनुबन्ध गरेको छ। युरोप र अमेरिकाको शीर्ष लिगहरुमा अनुभव बटुलिसकेका उनले स्कटल्याण्डलाई प्रतिनिधित्व गरिसकेका छन्।

जापनी स्ट्राइकर केन्ता हारालाई पनि बुटवलले अनुबन्धित गरेको छ। एसिया र युरोपका लिगको अनुभव बटुलिसकेका उनी बुटवलको अट्याकिङमा महत्त्वपूर्ण बन्न सक्छन्। त्यस्तै इङ्ग्ल्याण्डका अनुभवी सेन्टर ब्याक एडम मिट्टर संन्यास फिर्ता लिएर मैदानमा उत्रँदैछन्।

यी दुई टोली हालसम्म एक पटक आमनेसामने भएका छन्। जसमा झापाले बाजी मारेको थियो।