काठमाडौं। सेयर बजारमा लगातार चौथो दिन गिरावट आएको छ। नेप्से परिसूचक बिहीबार २.७० अंकले ओरालो लागेर २८१८.४३ विन्दु कायम भएको छ।
कारोबारमा आएका बैंकिङ, डेभलपमेन्ट बैंक, उत्पादन तथा प्रशोधन र माइक्रो फाइनान्स बाहेकका उपसमूहले बजार घटाएका हुन्। १३२ कम्पनीको सेयर मूल्य घटेको छ।
९९ कम्पनीको मूल्य बढेको छ। गार्डियन माइक्रोलाइफ, भूगोल इनर्जी र उपकार लघुवित्तको सेयर मूल्यमा पोजेटिभ सर्किट लागेको छ।
बजारमा १० अर्ब १० करोड १८ लाख रुपैयाँको सेयर किनबेच भएको छ। हिमालयन रि-इन्स्योरेन्सको सर्वाधिक १ अर्ब १२ करोड ८३ लाख रुपैयाँको सेयर कारोबार भएको छ।
त्यस्तै, नेपाल रि-इन्स्योरेन्सको १ अर्ब ८ करोड, एनआरएन इन्फ्रास्ट्रक्चर डेभलपमेन्टको ३४ करोड १७ लाख र घलेम्दी हाइड्रोपावरको ३१ करोड ५७ लाख रुपैयाँको सेयर किनबेच भएको छ।
