काठमाडौं । एचसीपी क्योरब्लाइन्डनेसका नेपाल र भूटानका देश निर्देशक पुनम भण्डारीलाई अन्तर्राष्ट्रिय अन्धोपन रोकथाम एजेन्सी (आईएपीबी)ले आईएपीबी युवा प्रणाली नेता पुरस्कारले सम्मानित गरेको छ।
मेक्सिको सिटीमा आयोजित आईएपीबी २०३० इनसाइट लाइभ सम्मेलनमा भण्डारीलाई सो पुरस्कार प्रदान गरिएको हो। आईएपीबीले आँखा स्वास्थ्य क्षेत्रमा महत्वपूर्ण योगदान पुर्याउने र दिगो प्रणालीहरूको हेरचाहलाई अघि बढाउन सहयोग पुर्याउनेहरुलाई यो पुरस्कार प्रदान गर्दै आएको छ।
भण्डारीको नेतृत्व र समर्पण एचसीपी क्योरब्लाइन्डनेसको दृष्टि रोकथाम गर्ने मिसनमा महत्वपूर्ण रहेको आईएपीबीले जनाएको छ। आईएपीबीले प्रवर्द्धन गर्ने नविन र प्रणालीगत दृष्टिकोणलाई उदाहरणीय बनाएको छ।
पुनम भण्डारीको युवा प्रणाली नेता रूपमा पहिचानले आँखा हेरचाह सेवाहरूलाई सुधार गर्न र दिगो स्वास्थ्य सेवा प्रणालीहरू निर्माण गर्न उनको महत्वपूर्ण भूमिकालाई प्रकाश पार्ने जनाइएको छ।
आईएपीबीका अध्यक्ष क्यारोलाइन केसिले पुरस्कार प्राप्तकर्ताहरूको प्रशंसा गर्दै आँखा स्वास्थ्यको भविष्य नयाँ पुस्ताको काँधमा रहेको भन्दै आईएपीबी युवा प्रणाली नेता पुरस्कारले आँखा स्वास्थ्यको भविष्यलाई परिभाषित गर्ने र धेरैको जीवनलाई राम्रो बनाउने उज्ज्वलता, उत्साह र सहकार्यको भावनाको उत्सव मनाउने विश्वास व्यक्त गरिन्।
आईएपीबी युवा प्रणाली नेता पुरस्कारबाट भण्डारीसँगै ९ जना पुरस्कृत भएका थिए।
