शाहरुख खान अभिनित फिल्म ‘जवान’ प्रदर्शनको पहिलो दिनमा सबैभन्दा धेरै कमाइ गर्ने हिन्दी भाषाको फिल्म बनेको छ। ‘जवान’ले बिहीबार घरेलु बक्स अफिसमा नेट ७५ करोडको ओपनिङ गरेको बलिउड हंगामाले उल्लेख गरेको छ।
ओपनिङमा धेरै कमाइ गर्ने शाहरुखकै अघिल्लो उत्कृष्ट फिल्म ‘पठान’लाई पछि पार्दै ‘जवान’ अहिलेसम्मकै सबैभन्दा ठूलो ओपनिङ गर्ने फिल्म बनेको हो। भारतको गणतन्त्र दिवसका दिनमा रिलिज भएको ‘पठान’ले यसअघि ७० करोडको रेकर्ड बनाएको थियो।
‘जवान’ले पहिलो दिनमा हिन्दीतर्फ ६५ करोड भारु र तमिल तथा तेलुगुतर्फ करिब १० करोड कमाएको अनुमान गरिएको छ। ‘जवान’ ठूलो ओपनिङ गर्ने तमिल र तेलुगुमा डब गरिएको हिन्दी भाषाको फिल्प पनि बनेको छ।
‘जवान’ले तमिल र तेलुगुमा डब गरिएको हिन्दी फिल्म ‘ब्रह्मास्त्र’को अघिल्लो रेकर्डलाई उछिनेको हो। रणवीर कपुर र आलिया भट्ट अभिनित फिल्मले पहिलो दिन डब संस्करणतर्फ ३.७५ करोड नेट कमाएको थियो।
नयनथारा र विजय सेतुपतिलाई फिल्ममा राखेकाले पनि ‘जवान’लाई तमिलनाडुमा निकै फाइदा पुगेको छ। डब संस्करणको ओपनिङले रेकर्ड तोड्नुका साथै प्रारम्भिक दर्शकहरूको प्रतिक्रिया पनि अत्यन्त सकारात्मक हुँदा ‘जवान’को लागि पहिलो पान इन्डिया ब्लकबस्टर बन्न प्लेटफर्म तयार भएको छ।
दर्शककै प्रतिक्रियाका आधारमा पनि ‘जवान’ले सप्ताहन्तसम्म अझै आक्रामक व्यापार गर्ने अपेक्षा गरिएको छ।
‘जवान’ले समाजको गल्ती सच्याउन निस्किएका एक व्यक्तिको कथा प्रस्तुत गरेका छन्। फिल्ममा शाहरुखका अलावा विजय सेतुपति र नयनथाराको पनि अभिनय रहेको छ।
फिल्मले सरकारी उदासीनता, भ्रष्टाचार, किसानको आत्महत्या, स्वास्थ्य सेवाका समस्या, कमजोर सेनाको हतियार र आवासीय क्षेत्र नजिकै रहेका खतरनाक कारखाना जस्ता विषयलाई पनि उठाएको छ। रेड चिलीज इन्टरटेनमेन्टको प्रस्तुति रहेको ‘जवान’को निर्मातामा गौरी खान र गौरव वर्मा सह-निर्माता रहेका छन्।
