तीन वर्षदेखि केरुङ्गे खोलामा पुल निर्माण अलपत्र, कारबाही गर्न खोज्दा आएको ठेकेदार फेरि सम्पर्कबिहीन

बिजमाण्डू
२०८० भदौ २२ गते ०८:३८ | Sep 8, 2023
तीन वर्षदेखि केरुङ्गे खोलामा पुल निर्माण अलपत्र, कारबाही गर्न खोज्दा आएको ठेकेदार फेरि सम्पर्कबिहीन

काठमाडौं । नवलपरासी (बर्दघाट सुस्तापूर्व) नवलपुरको कावासोतीस्थित केरुङ्गे खोलामा पुल निर्माण अलपत्र परेको छ। कावासोती नगरपालिका-३ र ४ लाई जोड्ने गरी केरुङ्गेखोलामा निर्माणाधीन पुल अलपत्र परेको हो।

Tata
GBIME
Nepal Life

तीन वर्षदेखि उक्त पुलको काम सुरु हुन सकेको छैन। विसं २०७७ असारसम्ममा पुल निर्माण सम्पन्न गर्नुपर्नेमा यसै अलपत्र पारी ठेकेदार सम्पर्कबिहीन भएपछि समस्या भएको कावासोती-४ का वडाध्यक्ष नारायणप्रसाद लोहनीले बताए। पुल काम विसं २०७५ मा सुरु भएको थियो।

पुलको केही भाग निर्माण सकिएको छ। बीच खण्डमा ढलानको काम बाँकी रहेको छ। आफूले पटक-पटक फोन गर्दा ठेकेदार सम्पर्कमा नआएको र कामसमेत अघि नबढाएको उहाँले बताए।

‘वडा, पालिकास्तरबाट पटक-पटक ताकेता गर्‍यौं। तर निर्माणको काम अघि बढाउन ठेकेदारले आलटाल गर्दै आएको छ’, वडाध्यक्ष लोहनीले भने।

पुल निर्माण नहुँदा पानी पर्ने बित्तिकै आवतजावतमा समस्या हुने गरेको उनले बताए।

१४० मिटर लम्बाइको पुल करिब १० करोड ५० लाख रुपैयाँमा निर्माण सम्पन्न गर्ने गरी ठेक्का लगाइएको थियो। तर पटक-पटक म्याद थप गर्दासमेत निर्माणको कामले पूर्णता पाउन सकेको छैन।

पछिल्लोपटक विसं २०८० असारसम्म पुल निर्माण गर्ने गरी म्याद थप गरिएको थियो। यस अवधिमा समेत काम नसकेपछि पुलको काम झनै अन्योल अवस्थामा पुगेको वडाध्यक्ष लोहनीले बताए।

कावासोती-३ र ४ लाई जोड्ने मात्रै नभएर हुप्सेकोट गाउँपालिकालाई सहजरूपमा सदरमुकाम कावासोती आउने सडकखण्डको पुलसमेत भएकाले यसको निर्माणमा ढिलाइ हुँदा जनताले धेरै सास्ती खेप्नुपरेको उनको भनाइ थियो।

निर्माणधीन पुल अलपत्र पारेर ठेकेदार बेपत्ता भएपछि कावासोती नगरपालिकाले जिल्ला प्रशासन कार्यालय नवलपुरलाई पत्राचार गरी ठेकेदारलाई झिकाई आवश्यक कारबाही र निर्माणको काम अघि बढाउन यसअघि पत्राचारसमेत गरेको थियो। गत असारमा निर्माण कम्पनीले असारभित्र ढलान गरी काम सक्ने प्रतिबद्धतासमेत जनाएकामा सो समयमा कुनै काम नगरी अहिलेसम्म अलपत्र पारेको वडाध्यक्ष लोहनीले बताए।

सडक डिभिजन कार्यालय भरतपुरका इन्जिनियर राजेन्द्र महर्जनका अनुसार पुल निर्माणको म्याद सकिएकाले केन्द्रबाट म्याद थप भएमा काम अघि बढ्ने जानकारी दिए। नियमित प्रक्रियामा पुलको म्याद थप नहुने र पुराना ठेक्काको म्याद थप गर्ने मन्त्रिपरिषद्को निर्णय आएमात्र म्याद थप हुने उनले बताए।

विकल्पमा सोही ठेकेदारबाट काम गराउनका लागि १० प्रतिशत क्षतिपूर्ति तिराएर काम लगाउन सकिने उनको भनाइ छ।

‘पुल निर्माण यसअघि नै सक्नुपर्नेमा ढिलो भयो। म्याद थप भएको छैन। केन्द्र सरकारले म्याद थप गरेमात्रै काम अघि बढ्ने हो वा क्षतिपूर्ति तिरेर काम गर्न सक्छ’, उनले भने, ‘अब वर्षा पनि कम हुन लागेको छ। ठेकेदारलाई चिठ्ठी काट्नुपर्ला।’ रासस