काठमाडौं। एसिया कप क्रिेेकेटको उद्घाटन खेलमा नेपालले अहिले पाकिस्तानसँग खेलिरहेको छ। पाकिस्तानको मुल्तान रंगशालामा भइरहेको खेलमा टस हारेपछि नेपालले बलिङ गरिरहेको छ। यो नेपालको ऐतिहासिक खेल हो।
एसिया कपमा नेपालको यो डेब्यु खेल हो। एकदिवसीय वरीयताको शीर्ष स्थानमा रहेको पाकिस्तानसँग नेपालले पहिलोपटक खेलिरहेको हो। यो ऐतिहासिक खेल नेपालीहरुले प्रत्यक्ष प्रसारणमार्फत हेरिरहेका छन्।
होटल रेष्टुरेन्टहरुले प्रत्यक्ष प्रसारण हेर्ने व्यवस्था गरेका छन्। त्यस्ता रेष्टुरेन्टमा बाक्लो उपस्थिति देखिएको छ। राष्ट्रपति रामचन्द्र पौडेलले समेत खेल हेरिरहेका छन्।
यस्तै विभिन्न राजनीतिक दलका नेताले नेपालको जर्सी लगाएर पार्टी कार्यालयमा खेल हेरिरहेका छन्।
केही स्थानीय तहले खेल हेर्नका लागि विद्यालय बन्द नै गरेका छन् भने कतिपय विद्यालयले विद्यार्थीलाई पढाइ रोकेर खेल हेराएका छन्।
