बुटवल । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले अब समाजवादी गणतन्त्रमा जानुपर्ने आवश्यकता रहेको बताएका छन्। समाजवादी मोर्चाले मंगलबार बुटवलमा आयोजना गरेको सन्देश सभालाई सम्बोधन गर्दै प्रचण्डले मुलुकमा लोकतान्त्रिक गणतन्त्र स्थापना गरिए पनि जनताको गणतन्त्र नभएको बताउँदै समाजवादी गणतन्त्रमा जानुपर्ने बताएका हुन्।
‘अहिलेको गणतन्त्र जनताको हो की बुर्जवाको हो अझै टुंगो लागेको छैन। हामी समाजवादी गणतन्त्र स्थापना गर्न चाहन्छौं,’ उनले भने।
समाजवादी गणतन्त्रका लागि अब छिट्टै सडकमा जाने प्रचण्डले उद्घोषसमेत गरेका छन्। उनले गणतन्त्रका उपलब्धिलाई संस्थागत गर्न, संविधानको रक्षा तथा गरिब उत्पीडित जनताका लागि अधिकार प्रत्याभूत गर्नका लागि समाजवादी मोर्चा बनाइएको बताए।
सम्बोधनका क्रममा प्रचण्डले नेकपा एमालेका अध्यक्ष केपी शर्मा ओली नक्कली कम्युनिष्ट भएको पनि आरोप लगाए। संविधान कुल्चिएर संसद् विघटन गर्ने र परिवर्तनका उपलब्धिलाई दबाउन खोज्ने कसरी कम्युनिष्ट हुनसक्छ भन्दै उनले प्रश्न गरेका थिए।
लुम्बिनीमा समाजवादी मोर्चा घोषणा
आज लुम्बिनी प्रदेशमा समाजवादी मोर्चा घोषणा गरिएको छ। बुटवलमा आयोजना गरिएको मोर्चाको सन्देश सभामा प्रदेशस्तरीय समाजवादी मोर्चामा चयन गरिएका समितिका सदस्यको नाम घोषणा गरिएको हो।
समाजवादी मोर्चामा आबद्ध दलबाट तीन-तीन जना सदस्य रहने गरी समन्वय कमिटी गठन गरिएको हो। माओवादी केन्द्रको तर्फबाट प्रदेश अध्यक्ष सुदर्शन बराल, उपाध्यक्ष दुर्गाबहादुर थारु र सचिव कृष्ण अधिकारी रहेका छन्।
त्यस्तै नेकपा (एकीकृत समाजवादी) को तर्फबाट पोलिटब्यूरो सदस्य सोमप्रसाद पाण्डे, निर्मल सुवेदी र मेटमणि चौधरी, जनता समाजवादी पार्टीबाट नवीनकुमार सुनुवार, मनिकर कार्की र अशोक यादव रहेका छन् भने नेपाल कम्युनिष्ट पार्टीबाट पोलिटब्यूरो सदस्य वसन्त श्रेष्ठ तथा नारायण र सम्झना रहेका छन्।
