काठमाडौं। राष्ट्रपति रामचन्द्र पौडेलले बडादसैँको अन्तिम दिन कोजाग्रत पूर्णिमाका अवसरमा आइतबार भक्तपुरको नवदुर्गा मन्दिरमा पूजाअर्चना गरेका छन्।
राष्ट्रपति पौडेलले नवदुर्गा देवगणका मूर्ति अवलोकन गरी दर्शन गर्नुको साथै नवदुर्गाका पुजारी, नाइके र देवगणलाई दक्षिणा प्रदान गरे।
नवदुर्गा मन्दिरमा ब्रह्मयणी, महेश्वरी, कुमारी, वैष्णवी, बाराही, महाकाली, महालक्ष्मी, त्रिपुरासुन्दरी र भद्रकालीको पूजा गरिन्छ।
राष्ट्रपति पौडेललाई मन्दिरका मूल नाइकेले तलेजु मन्दिरबाट ल्याइएको टीका तथा प्रसाद प्रदान गरेका थिए। दसैंको अन्तिम दिन राष्ट्र प्रमुखले नवदुर्गा भगवतीको पूजाअर्चना गर्ने चलन छ।
