काठमाडौं। अन्नपूर्ण स्पाइकर किंग्स नेपाल भलिबल लिग (एनभीएल)को फाइनलमा पुगेको छ। आजसम्पन्न खेलमा सगरमाथा स्म्यासर्सलाई हराउँदै अन्नपूर्ण १२ अंकको स्पष्ट अग्रतासहित अंक तालिकामा शीर्ष स्थानमा रहँदै फाइनलमा पुगेको हो। लिगमा शीर्ष स्थानमा रहने टोली सोझै फाइनलमा पुग्ने प्रावधान छ।
त्रिपुरेश्वरस्थित राष्ट्रिय खेलकुद परिषद्को कभर्डहलमा अन्नपूर्णले सगरमाथा स्म्यासर्सलाई ३-१ को सेटमा हरायो। पहिलो सेटमा २१-२५ ले पछि परेको अन्नपूर्णले बाँकी सेटको नतिजा लगातार आफ्नो पक्षमा पार्यो। अन्नपूर्णले दोश्रोमा २५-२३, तेश्रोमा २५-१४ र चौथोमा २५-२० को प्रदर्शन गर्दै जित सुनिश्चित गर्यो। अन्नपूर्णका एन्ख एर्डेन जार्गाल्ट्सगोट ‘म्यान अफ द म्याच’ बने।
छ टिम सहभागी लिगमा अन्नपूर्णको यो लगातार चौथो जित हो। पहिलो खेलमा अन्नपूर्ण कर्णाली शिवरजासंग ३-१ ले पराजित भएको थियो। अन्नपूर्णले दोश्रो खेलमा काठमाडौं रेड्सलाई ३-०, तेश्रोमा मधेश वारियर्सलाई ३-१ र खप्तड फाल्कन्सलाई ३-० ले हराएको थियो।
सगरमाथा लगातार तेश्रो हारसंगै प्रतियोगिताबाट बाहिरिएको छ। अन्नपूर्णसंग पराजित हुनुअघि सगरमाथा कर्णालीसंग ३-२ तथा काठमाडौं रेड्ससंग ३-० ले चुकेको थियो। २ खेल जितेको सगरमाथाले मधेशलाई ३-१ र खप्तडलाई ३-० ले हराएको थियो।
आज जारी दोस्रो खेलमा मधेश र कर्णालीबीच प्रतिस्पर्धामा छन् भने काठमाडौं रेड्स र खप्तडबीच ७ बजे बजे खेल हुनेछ।
जारी प्रतियोगितामा ६ पुरुष टिम सहभागी छन्। सहभागी टिमले पहिले सिंगल राउन्ड रोविन लिगका आधारमा खेल्ने छन्। लिगमा शीर्ष स्थानमा रहने टोली फाइनलमा प्रवेश गर्ने छ। शीर्ष दुई र तेश्रो स्थानमा रहने टोलीले फाइनल प्रवेशका लागि प्लेअफ खेल्ने छन्।
नेपाल भलिबल लिगको कुल पुरस्कार राशी ३२ लाख रुपैयाँ रहेको छ। विजेताले २० लाख नगद पुरस्कार प्राप्त गर्ने छ। प्रतियोगिताको फाइनल भदौ २७ गते हुनेछ ।
