विराटनगर। जेनजी आन्दोलनको मौका पारेर पसेको भीडले गत भदौ २४ को ध्वस्त पारेको भाटभटेनीको विराटनगरस्थित सुपरस्टोर शनिबारदेखि पुनः सञ्चालनमा आएको छ।
भाटभटेनीका सञ्चालक सावित्री गुरुङले शनिबार वैदिक सनातन पद्धति अनुसार पूजाआजा र बत्ती बालेर सुपरस्टोर पुनः सञ्चालनको उद्घाटन गरेकी हुन्। भदौयता विराटनगर वरपरका धेरै ग्राहकले प्रेम र चासोका साथ भाटभटेनी कहिले खुल्छ भन्ने प्रश्न बारम्बार गर्ने गरेको उनले बताइन्।
गुरुङले ग्राहककै सदभाव, सहानुभूति र स्नेहले भाटभटेनी परिवार खरानीबाट उठ्न सफल भएको स्पष्ट पारिन्। भाटभटेनीका प्रमुख सञ्चालन अधिकृत पानु पौडेलले यसअघि भाटभटेनीको वेयर हाउससहित कोटेश्वर, महाराजगंज, चितवन भरतपुर, पोखरा र बौद्धका सुपरस्टोर पुनः संचालनमा आइसकेको जानकारी दिए।
अधिकृत पौडेलका अनुसार भदौ महिनामा बिर्तामोड, धरान र टंगाल गरी तीन स्थानको सुपरस्टोर सञ्चालन गर्ने लक्ष्य छ। त्यसपछि हेटौंडा र दमकका सुपरस्टोर पुनः सञ्चालन गर्ने तयारी भइरहेको छ।
