काठमाडौं। प्रधानमन्त्री बालेन्द्र शाहको चाहनामा बजेटमा समावेश गरिएको पर्यटकीय राजमार्गमा २८ जिल्लाका सडकलाई समेटिएको छ।

सरकारले पूर्वाधार विकास मन्त्रालयअन्तर्गत पर्यटकीय राजमार्ग निर्माण शीर्षकमा १ अर्ब ४५ करोड र स्थानीय पर्यटकीय मार्ग पूर्वाधार विकास कार्यक्रममा ४९ करोड ५६ लाख रुपैयाँ छुट्याइ विभिन्न २८ जिल्लाका सडक समेटेको हो। पर्यटकीय मार्गलाई वहुवर्षीयमा राखेर ३ वर्षभित्र सम्पन्न गर्ने लक्ष्य लिइएको छ।

स्थानीय पर्यटकीय मार्ग पूर्वाधार विकासका योजना सात वटै प्रदेशमा सञ्चालन गरिनेछ।

सुदूरपश्चिममा पर्यटकीय गन्तव्य खप्तड र रामारोशन सरकारको प्राथमिकतामा परेका छन्। अछामको पञ्चदेवल-ऐरिगड-रामारोशन पर्यटकीय सडक, मंगलसेन-जुपु कालागाउँ-ताली-शान्ताडा-चौका-रामारोशन पर्यटकीय सडक र साँफेबगर-खप्तड पर्यटकीय सडकका लागि बजेट विनियोजन गरिएको छ।

पर्यटकीय राजमार्ग अन्तर्गत कञ्चनपुरका ३ वटा सडक परेका छन्। मोहन्याल गाउँपालिकामा सोल्टा-ताम्चा-राक्सा २५ किलोमिटर सडक र बेदकोट नगरपालिकामा दैजी-जोगबुढा सडक खण्ड निर्माण तथा मोहन्यालको मालिका मन्दिर क्षेत्रको धार्मिक तथा पर्यटकीय विकासका लागि बाघमारादेखि मालिकासम्म २१ किलोमिटर सडक स्तरोन्नतिको योजना समेटिएको हो।

यस्तै जुम्लाको खलङ्गा-जुम्ला-खाली-भुलभुले-ताल्चा-रारा सडकलाई पर्यटकीय सडकको सूचीमा राखेर बजेट राखिएको छ।पश्चिम रुकुमको त्रिपुरासुन्दरीदेखि डोल्पाको शे-फोक्सुण्डो जाने सडक बालेनको योजनामा परेको छ।

रुपन्देहीको झुम्सा-चरङ्गे सडक, म्याग्दीको पोखरेबगर-पाउदार-जिन्दु-शिख १० किलोमिटर सडक, तनहुँको शालिग्राम कोरिडोर र तनहुँकै देवघाट गाउँपालिकादेखि कालीगण्डकी कोरिडोर हुँदै स्याङ्जा जोड्ने करिब ६४ किलोमिटर सडकले बजेट पाएको छ।

तनहुँमै छिम्केश्वरीदेखि हिलेखर्क हुँदै बाहुन भन्ज्याङ बन्दीपुर जोड्ने सडक र बन्दीपुरदेखि उपल्लोफाँट, छबिसे, तामुङ्ग, कुलुङ हुँदै प्रसिद्ध छाब्दी बाराही मन्दिरसम्म करिब १५ किलोमिटर सडक बनाउन बजेट हालिएको छ।

कालिगण्डकी कोरिडोर (बागलुङ) खण्डको निरिङ्गेदेखि बिनामारे स्वास्थ्य चौकी-रिट्टेडाँडा सडक र चितवनको बिहुँकोट हटिया-पिडाल्ना स्वार-करलिम असारेथाम सडक स्तरोन्नति गर्न बजेट राखिएको छ।

यस्तै काठमाडौंमा विभिन्न सडक डिभिजनमार्फत पर्यटकीय सडक स्तरोन्नति गर्ने भनिएको छ। तर योजना पहिचान गरिएको छैन।

गोरखामा रिङ्गरोडको अवधारणासहित आरुघाट-धारापानी-सिस्नेरी-सातदोबाटो भुवाने चुरुङ्ग-आलैचे फूलपातीडाँडा-आरुघाट २५ किलोमिटर सडक र धादिङको ज्वालामुखी गाउँपालिका जाने घ्याङ्गखोला-अमराई-सिरिसपानी-गैरीगाउँ-दारेगौडा-सातदोबाटो-हटिया-सिरिसपानी सडक पर्यटकीय राजमार्ग कार्यक्रममा परेका छन्।

इलामको इलाम-सन्दकपुर, सोलुखुम्बुको सल्लेरी-लुक्ला-एभरेष्ट बेस क्याम्प, सुनसरीको बुढहरि चोकदेखि साल्पादेवी मन्दिरसम्म, सप्तरीको छिन्नमस्ता-राजविराज-भारदह-कंकालिनीमाई, दोलखाको मालुखोला छाउदे सडकको डाँडागाँउ छाउदे खण्ड, सिन्धुपाल्चोकको पाँचपोखरी थाङपाल-ढाउपेन-केउरेनी-बरुवा-यांग्री सडक कालफत्रे तथा स्तरोन्नति गर्ने भनिएको छ।