काठमाडौं । तेस्रो संस्करणको ‘तेन्जिङ नोर्गे शेर्पा ओपन लिड क्लाइम्बिङ प्रतियोगिता’ सुरु भएको छ। नेपालमा खेलकुद पर्वतारोहण प्रवर्धन गर्ने उद्देश्यसहित काठमाडौंमा आजदेखि प्रतियोगिता सुरु भएको हो।
नेपाल राष्ट्रिय पर्वत मार्गदर्शक संघ (एनएनएमजीए) र यूएस नेपाल क्लाइम्बर्स एसोसिएसन इन्क.को संयुक्त आयोजनामा यो प्रतियोगिता भइरहेको हो।
प्रतियोगिताको उद्घाटन ठमेलस्थित एस्टरेक क्लाइम्बिङ वालमा गरिएको हो। आयोजकका अनुसार प्रतियोगितामा २७ पुरुष र ११ महिला खेलाडी सहभागी छन्। सहभागीमध्ये एक पुरुष र एक महिला विदेशी नागरिक पनि रहेका छन्।
यस वर्षको संस्करण विशेष रूपमा पहिलो पटक लिड क्लाइम्बिङ विधामा आयोजना गरिएको जनाइएको छ। यसअघि दुई संस्करणहरू टप-रोप क्लाइम्बिङ विधामा मात्र सीमित थिए।
पुरुष र महिला दुवै विधामा प्रतिस्पर्धा भइरहेको छ। विजेताहरूलाई प्रथम स्थानका लागि ५० हजार, दोस्रोका लागि ३० हजार र तेस्रोका लागि २० हजार नगद पुरस्कार प्रदान गरिनेछ।
प्रतियोगिताको फाइनल कार्यक्रम मे २९ मा हुनेछ।
