काठमाडौं । सरकारले राजधानीको सडक विस्तारको क्रमलाई निरन्तरता दिएको छ । साँघुरा सडकका कारण राजधानीमा सवारी साधन व्यवस्थापनै अस्तब्यस्त भएपछि सरकारले सडक फराकिलो बनाउने अभियान थालेको थियो । यसै क्रममा लैनचौर– महाराजगञ्ज– गल्फुटार सडक र पुरानो वानेश्वर– नयाँ वानेश्वर– शंखमूल सडकसँग जोडिएका दायाँवायाँका संरचना भत्काउन सार्वजनिक अपिल गरेको छ ।
यो संरचना आफैले नभत्काएमा मेसिन प्रयोग गरिने चेतावनी दिएको छ । उपत्यका विकास प्राधिकरणले जारी गरेको सूचनामा लैनचौर– महाराजगञ्ज सडकमा दायाँवायाँ ९ मिटर र पुरानो वानेश्वर– नयाँवानेश्वर सडकमा दायाँबायाँ ७ मिटरका आफ्ना संरचना भत्काउनुपर्ने उल्लेख गरेको छ । सडक भत्काउने र सडक कालोपत्रे गर्ने कामलाई समेत सरकारले निरन्तरता दिएको छ । प्रधानमन्त्री बाबुराम भट्टराईले दुई साताअघि जनताको नाममा संबोधन गर्दै दशैअघि राजधानीका सडक कालोपत्रे भइसक्ने बताएका थिए । यही योजना अनुसार भौतिक योजना तथा निर्माण मन्त्रालयले कालोपत्रेको कामलाई तीब्रता दिएको छ । मन्त्रालयका अनुसार माइतीघर –तीनकुने सडक वाहेकका भित्री सडकहरु दशैअघिनै कालोपत्रे भइसक्नेछन् । राजधानीवासीले सडक फराकिलो पार्ने काम मात्रै भएको तर निर्माण नभएको भन्दै आलोचना गरिरहेका बेला सरकारले कालोपत्रेलाई तिब्रता दिएको हो । सडक फराकिलो पार्ने क्रममा विजुली, पानी, ढल र टेलिफोनका संरचना समयमै नसार्दा कालोपत्रे हुन नसकेको मन्त्रालयले जनाएको छ । सडक कालोपत्रेसँगै पेटी समेत उच्च गुणस्तरको बनाउन खोज्दा धेरै समय लागेको मन्त्रालयको भनाई छ । राजधानीको सबै सडकमा ढुंगा छापेर पेटी निर्माण गरिएको छ ।