बलिउडका दिग्गज अभिनेता नाना पाटेकरको बिहीबार बिहान ७५ वर्षको उमेरमा निधन भएको छ। गोवास्थित आफ्नै निवासमा कार्डियक अरेस्ट भएपछि उनलाई तत्काल अस्पताल लगिएको थियो।

चिकित्सकले करिब ४५ मिनेटसम्म निरन्तर सीपीआर दिए पनि बचाउन सकेनन्। उनलाई बिहान ५:२० बजे मृत घोषणा गरिएको भारतीय सञ्चारमाध्यमले जनाएका छन्। पाटेकरको निधनको पुष्टि उनका छोरा मल्हार पाटेकरले गरेका छन्।

मल्हार पुणेमा रहेको र बुवाको निधनको खबर पाएपछि गोवा गएको बताइएको छ। पाटेकरलाई गोवाको डोना पाउलास्थित निवासमा अचेत अवस्थामा भेटिएपछि उपचारका लागि मणिपाल अस्पताल लगिएको थियो।

मणिपाल अस्पतालका चिकित्सक डा. शेखर सालकरका अनुसार अस्पताल ल्याएपछि पाटेकरलाई बचाउन चिकित्सकको टोलीले करिब ४५ मिनेट प्रयास गरेको थियो। तर उनको अवस्थामा सुधार नआएपछि बिहान ५:२० बजे मृत घोषणा गरिएको हो। घटनालाई मेडिको–लिगल केसका रूपमा दर्ता गरिएको र पोस्टमार्टम गरिने चिकित्सकले बताएका छन्।

पाटेकरको निधनको खबरसँगै भारतीय फिल्म उद्योगमा शोक छाएको छ। चार दशकभन्दा लामो फिल्मी यात्रामा उनले हिन्दी तथा मराठी सिनेमामा फरक र प्रभावशाली अभिनय शैली स्थापित गरेका थिए। गम्भीर चरित्रदेखि हास्य भूमिकासम्म उत्तिकै प्रभावकारी अभिनय गर्ने कलाकारका रूपमा उनी दर्शकमाझ परिचित थिए।

सन् १९७८ मा ‘गमन’बाट फिल्मी करियर सुरु गरेका पाटेकरले ‘परिन्दा,’ ‘क्रान्तिवीर,’ ‘अग्निसाक्षी,’ ‘खामोशीः द म्युजिकल,’ ‘अब तक छप्पन,’ ‘वेलकम’ र ‘नटसम्राट’लगायत चर्चित फिल्ममा अभिनय गरेका थिए। उनको अभिनयमा संवाद प्रस्तुतिको विशिष्ट शैली, तीव्र भावभंगिमा र चरित्रअनुसार आफूलाई परिवर्तन गर्ने क्षमता देखिन्थ्यो।

‘परिन्दा’ र ‘क्रान्तिवीर’ लगायतका कामबाट उनले राष्ट्रिय फिल्म पुरस्कार प्राप्त गरेका थिए। अभिनयसँगै उनी निर्देशनमा पनि सक्रिय थिए। सन् १९९१ मा उनले ‘प्रहारः द फाइनल अट्याक’ निर्देशन गरेका थिए।

पाटेकर पछिल्लो समय पनि फिल्म तथा सार्वजनिक कार्यक्रममा सक्रिय थिए। निधन हुनुभन्दा चार दिनअघि मात्र उनी गोवामा आयोजित एक कार्यक्रममा सार्वजनिक रूपमा देखिएका थिए। त्यस कार्यक्रममा उनले सम्बोधनसमेत गरेका थिए।

उनलाई भारत सरकारले सन् २०१३ मा पद्मश्रीबाट सम्मान गरेको थियो। अभिनयबाहेक पाटेकर सामाजिक काममा पनि संलग्न थिए। विशेषगरी किसान तथा ग्रामीण क्षेत्रका समस्यासँग जोडिएका विषयमा उनले सार्वजनिक रूपमा आवाज उठाउँदै आएका थिए।

पाटेकरको निधनसँगै भारतीय सिनेमाले पर्दामा गहिरो प्रभाव छाड्ने एक वरिष्ठ कलाकार गुमाएको छ। उनको चार दशकभन्दा लामो अभिनय यात्रामा निर्वाह गरेका गम्भीर, सामाजिक, खलनायक तथा हास्य चरित्रका कारण उनी हिन्दी र मराठी दुवै फिल्म उद्योगमा अलग पहिचान बनाउन सफल भएका थिए।