काठमाडौं। उद्योगमन्त्री आफैं डिपोहरुको अनुगमनमा जाँदा पनि खाना पकाउने ग्यासको वितरणमा सुधार नआएपछि सरकारले अब सादा पोसाकका प्रहरी परिचालन गर्ने भएको छ।
ग्यास कालोबजारी भइरहेको सूचना पाएको भन्दै गृह मन्त्रालय र उद्योग मन्त्रालयबीचको समन्वयमा काठमाडौं उपत्यकाका विभिन्न ग्यास डिपोमा सादा पोसाकका प्रहरी परिचालन गरिने भएको हो।
भारतबाट ग्यास आयातमा समस्या नभए पनि बजारमा अभाव छ। एकाएक कृत्रिम अभाव सिर्जना गरी कालोबजारी भइरहेको भन्दै उद्योग मन्त्रालयमा उपभोक्ताबाट लगातार गुनासो आइरहँदा उद्योगमन्त्री गौरी यादवले यसबारे गम्भीर चासो लिएको उनको सचिवालयले जनाएको छ।
ग्यासको आपूर्ति सहज हुँदाहुँदै पनि बजारमा अभाव देखाएर उपभोक्तालाई महँगोमा ग्यास बिक्री गर्ने तथा कृत्रिम अभाव सिर्जना गर्ने गतिविधि नियन्त्रण गर्न मन्त्री यादवले गृहमन्त्री सुदन गुरुङसँग अनुगमनमा प्रहरीको सहयोग मागेकी थिइन।
गृहमन्त्री गुरुङले प्रहरी प्रशासनलाई ग्यास डिपो तथा बिक्री केन्द्रमा निगरानी बढाउन र आवश्यकताअनुसार सादा पोसाकका प्रहरी परिचालन गर्न निर्देशन दिएका छन्। सरकारले ग्यासको कृत्रिम अभाव सिर्जना गर्ने, लुकाउने तथा तोकिएको मूल्यभन्दा बढीमा बिक्री गर्ने व्यवसायीमाथि निगरानी बढाउँदै दोषी भेटिए कारबाही गर्ने तयारी गरेको जनाइएको छ।
उपभोक्ताले ग्यास सहज रूपमा पाउने वातावरण सुनिश्चित गर्न अनुगमनलाई थप प्रभावकारी बनाइने बताइएको छ।
