काठमाडौं। बुद्ध एयरले एटीआर ७२-६०० जहाज भित्र्याउन लागेको छ। यो वायुसेवा प्रदायक कम्पनीले ७२ सिटको एटीआर जहाज फ्रान्सबाट ल्याउन लागेको हो।
बुद्ध एयरका बजार निर्देशक रुपेश जोशीले जहाज शनिबार काठमाडौं आइपुग्ने जानकारी दिए। कम्पनीले ६ महिनाअघि नै जहाज ल्याउने प्रक्रिया अगाडि बढाएको थियो।
जोशीका अनुसार नेपाली पाइलट तालिममा रहेकाले विदेशी पाइलटको टोलीले जहाज ल्याउने तयारी छ।
उनले कम्पनीसँग अहिले रहेका जहाजको तुलनामा एटीआर ७२-६०० धेरै एडभान्स्ड भएको बताए। जहाज १० वर्ष पुरानो हो। बुद्धसँग अहिले एटीआर ७२-५०० जहाज १५ वटा छन्।
एटीआर ७२-६०० जहाज आएपछि प्रमुख आन्तरिक गन्तव्यमा उडान संख्या बढाउने योजना रहेको जोशीले जानकारी दिए। कम्पनी २० दिनभित्र अर्को जहाज पनि ल्याउने तयारीमा छ।
