काठमाडौं। वाणिज्य बैंकहरूले असार महिनाका लागि सार्वजनिक गरेको नयाँ ब्याजदरअनुसार अधिकांश बैंकहरूले ब्याजदर स्थिर राखेका छन् भने पाँच बैंकले मुद्दती निक्षेप (फिक्स्ड डिपोजिट)को ब्याजदर घटाएका छन्।

बैंकहरूले सार्वजनिक गरेकाे असारकाे ब्याजदर अनुसार अधिकांश बैंकहरूले जेठ महिनाकै दरलाई निरन्तरता दिएका छन्। तर बजारमा पर्याप्त तरलता रहेको र निक्षेप संकलनमा प्रतिस्पर्धा कम भएको कारण केही बैंकहरूले मुद्दती निक्षेपको ब्याजदर घटाएका छन्।

बैंकिङ क्षेत्रमा पछिल्लो समय निक्षेपको वृद्धिदर सन्तोषजनक रहँदा कर्जाको माग अपेक्षाकृत कमजोर देखिएको छ। यही अवस्थालाई ध्यानमा राख्दै ७ बैंकले व्यक्तिगत तथा संस्थागत मुद्दती निक्षेपमा प्रदान गर्ने ब्याजदर केही बिन्दुले घटाएका हुन्।

असारका लागि एनआइसी एसिया, एनएमबि, प्राइम, हिमालयन र स्टान्डर्ड चार्टर्ड बैंकले मुद्दतीको ब्याजदर घटाएका छन्।

ब्याजदर स्थिर राख्ने बैंकहरूले भने बजारको वर्तमान अवस्थालाई मूल्यांकन गर्दै तत्काल दर परिवर्तन आवश्यक नभएको निष्कर्ष निकालेका छन्। बैंकहरूको निर्णयले निक्षेपकर्ताले प्राप्त गर्ने प्रतिफलमा केही प्रभाव पार्ने भए पनि कर्जाको लागतमा भने तत्काल ठूलो परिवर्तन नदेखिने विश्लेषण गरिएको छ।

वित्तीय बजारमा तरलता सहज रहिरहेकाले आगामी महिनाहरूमा पनि ब्याजदरमा ठूलो उतारचढाव नआउने अनुमान गरिएको छ। यद्यपि कर्जाको माग, निक्षेप संकलनको अवस्था तथा मौद्रिक नीतिका व्यवस्थाले आगामी दिनमा ब्याजदरको दिशा निर्धारण गर्नेछ।