काठमाडौं। भर्टेल टेक्नोलोजिजले नेपालमा आफ्नो औपचारिक सेवा विस्तार गरेको छ। स्ट्रिम ट्राभल सर्भिसेजलाई नेपालका लागि जनरल सेल्स एजेन्ट (जीएसए) नियुक्त गर्दै भर्टेल नेपाली बजारमा प्रवेश गरेको हो।

भर्टेलले एयरलाइन वितरण तथा रिटेलिङ क्षेत्रका लागि न्यू डिस्ट्रिब्युसन क्यापाबिलिटी (एनडीसी)मा आधारित समाधान उपलब्ध गराउँदै आएको जनाएको छ।

मंगलबार काठमाडौंमा आयोजित कार्यक्रममा ५० भन्दा बढी प्रमुख ट्राभल एजेन्सी, पर्यटन व्यवसायी तथा उड्डयन क्षेत्रका प्रतिनिधिहरूका बीच उक्त घोषणा गरिएको थियो। कार्यक्रमले नेपालमा आधुनिक एयरलाइन वितरण तथा रिटेलिङ प्रविधिप्रति बढ्दो चासो र सम्भावनालाई उजागर गरेको थियो।

स्ट्रिम ट्राभल सर्भिसेजले कम्पनीको अत्याधुनिक वितरण प्लेटफर्मको स्थानीय प्रवर्धन र कार्यान्वयनमा सहकार्य गर्नेछ। यसबाट नेपाली ट्राभल एजेन्सीहरूले एयरलाइन साझेदारहरूसँग प्रत्यक्ष कनेक्टिभिटीमार्फत समृद्ध सामग्री, प्रतिस्पर्धी भाडादर, थप सेवा सुविधा तथा सहज बुकिङ प्रक्रियामा पहुँच पाउने अपेक्षा गरिएको छ।

कार्यक्रममा भर्टेलको टोलीले आफ्नो बी-टू-बी प्लेटफर्मको विस्तृत प्रस्तुति तथा प्रत्यक्ष प्रदर्शन गरेको थियो। प्रस्तुतीकरणका क्रममा कम्पनीले एनडीसी प्रविधिको उपयोगमार्फत ट्राभल एजेन्सीहरूले कसरी एयरलाइन सामग्रीमा सहज पहुँच, प्रभावकारी बुकिङ प्रक्रिया र उत्कृष्ट ग्राहक अनुभव प्रदान गर्न सक्छन् भन्नेबारे जानकारी दिएको थियो।

भर्टेलका संस्थापक तथा प्रमुख कार्यकारी अधिकृत जेरिन जोसले स्ट्रिम ट्राभल सर्भिसेजसँगको साझेदारीले नेपाली ट्राभल एजेन्सीहरूलाई आधुनिक एयरलाइन वितरण प्रविधिसँग जोड्दै थप समृद्ध सामग्री, लचिलो रिटेलिङ क्षमता तथा उत्कृष्ट बुकिङ अनुभव उपलब्ध गराउने विश्वास व्यक्त गरे।

स्ट्रिम ट्राभलका कार्यकारी निर्देशक आशिष के. सेनगुप्ताले यस सहकार्यले नेपाली बजारमा उन्नत वितरण प्रविधि भित्र्याउनुका साथै ट्राभल विक्रेताहरूलाई विश्वका अग्रणी एयरलाइन्सहरूको एनडीसी सामग्रीमा प्रत्यक्ष पहुँच प्रदान गर्ने उल्लेख गरे। स्थानीय विशेषज्ञता र सेवामार्फत ट्राभल एजेन्सीहरूको व्यावसायिक विकासमा सहयोग गर्न कम्पनी प्रतिबद्ध रहेको उनको भनाइ थियो।