च्याटजीपीटीको सञ्चालक अमेरिकी कम्पनी ओपनएआईले अब सर्वसाधारण उपभोक्ताभन्दा व्यवसायिक प्रयोगकर्तातर्फ ध्यान केन्द्रित गर्न थालेको छ। प्रतिस्पर्धी कम्पनी एन्थ्रोपिकसँगको दबाब बढ्दै जाँदा यस्तो रणनीतिक परिवर्तन गरेको हो।
ओपनएआईकी मुख्य वित्त अधिकृत (सीएफओ) सारा फ्रायरका अनुसार, जुन च्याटजीपीटीले उनलाई घरका लागि खानाका खास परिकार बनाउने विधि सुझाउँछ, त्यही उपकरणले अहिले उनको अफिसका सामान्य कामहरू पनि सिकाउँछ। इमेल र स्ल्याक सन्देश संक्षेप गर्ने जस्ता काम पनि गर्छ।
ओपनएआईका उच्च अधिकारीहरू अब यस्तै व्यवसायिक प्रयोग बढाएर कम्पनीलाई नाफामुखी बनाउने योजनामा छन्। यसका लागि कम्पनीले उपभोक्तामुखी केही परियोजनाहरू घटाउँदै व्यवसायिक उत्पादनमा जोड दिइरहेको छ।
कम्पनीले चाँडै उच्च मूल्यका पेसागत कामका लागि नयाँ एआई मोडेल ल्याउने घोषणा गरेको छ। यो कदम एन्थ्रोपिकसँगको प्रतिस्पर्धालाई ध्यानमा राखेर चालिएको हो, किनकि दुवै कम्पनीले कार्यालयहरूमा एआई सहायक प्रयोग बढाउन चाहिरहेका छन्।
ओपनएआईका अनुसार च्याटजीपीटीका साप्ताहिक प्रयोगकर्ता ९० करोडभन्दा बढी छन्, तर तीमध्ये करिब ९५ प्रतिशतले कुनै शुल्क तिर्दैनन्। यसले कम्पनीको महँगो कम्प्युटिङ खर्च बढाइरहेको छ, त्यसैले ठूला व्यवसायिक ग्राहकबाट आम्दानी बढाउन आवश्यक भएको हो।
हाल ओपनएआईको मूल्यांकन ८५२ अर्ब डलर छ भने एन्थ्रोपिकको ३८० अर्ब डलर। तर दुवै कम्पनीले आम्दानीभन्दा बढी खर्च गरिरहेका छन्, जसले उनीहरूलाई राजस्व बढाउन दबाब दिएको छ।
यही कारण ओपनएआईले केही उपभोक्तामुखी परियोजना, जस्तै भिडियो बनाउने एआई एप ‘सोरा’ रोक्ने निर्णय गरेको छ। कम्पनीले अब नयाँ स्मार्ट मोडेलमा ध्यान केन्द्रित गरिरहेको छ, जसले अझ राम्रो तर्क, प्रयोगकर्ताको उद्देश्य बुझ्ने क्षमता र विश्वसनीय नतिजा दिने दाबी गरिएको छ।
अर्कोतर्फ, एन्थ्रोपिकले क्लाउड मिथोस नामको शक्तिशाली मोडेल ल्याएको छ, जसले साइबर सुरक्षा क्षेत्रमा मानव विशेषज्ञलाई पनि चुनौती दिन सक्ने क्षमता राख्ने बताइएको छ। साथै उसले ‘ओपस ४.७’ पनि सार्वजनिक गरेको छ। यसको जवाफमा ओपनएआईले ‘जीपीटी–रोसलिन्ड’ नामक नयाँ मोडेल ल्याएको छ, जुन औषधि अनुसन्धान र जीवन विज्ञान क्षेत्रमा उपयोगी हुने बताइएको छ।
सारा फ्रायरका अनुसार, सन् २०२४ मा उनी कम्पनीमा आउँदा ओपनएआईको २० प्रतिशत आम्दानी मात्र व्यवसायिक ग्राहकबाट आउँथ्यो। अहिले त्यो ४० प्रतिशत पुगेको छ र यसै वर्ष ५० प्रतिशत पुग्ने अपेक्षा गरिएको छ।
यसबीच, कम्पनीले स्ल्याककी पूर्व प्रमुख डेनिस ड्रेसरलाई पहिलो चिफ रेभेन्यु अफिसर नियुक्त गरेको छ। उनले एआईलाई कार्यस्थलमा प्रयोग गर्ने कम्पनीहरूलाई लक्षित गर्दै काम गरिरहेकी छन्। उनका अनुसार, कम्पनीहरू अब परीक्षण चरणबाट अघि बढेर एआईलाई वास्तविक काममा प्रयोग गर्न थालेका छन्।
तर बजारमा प्रतिस्पर्धा कडा छ। एन्थ्रोपिकको ‘क्लाउड’ विशेषगरी सफ्टवेयर विकासकर्तामाझ लोकप्रिय छ। एन्थ्रोपिकले आफूलाई सुरक्षित एआई कम्पनीका रूपमा प्रस्तुत गर्दै आएको छ। विशेषज्ञहरूका अनुसार एन्थ्रोपिकको वृद्धि दर ओपनएआईभन्दा तीव्र देखिएको छ। यदि यही अवस्था रहिरह्यो भने दुवै कम्पनीबीचको प्रतिस्पर्धा झन् कडा हुनेछ।
तर आलोचकहरू एआई उद्योगको आर्थिक दिगोपनप्रति चिन्तित छन्। उनीहरूका अनुसार, यी कम्पनीहरू अत्यन्त महँगो प्रविधिमा निर्भर छन् र भविष्यमा सेवा सीमित गर्न वा शुल्क बढाउन सक्छन्। अन्ततः सबैले स्वीकार्ने कुरा के हो भने एआई प्रविधि अत्यन्त खर्चिलो छ। यसको दीर्घकालीन मूल्य कत्तिको हुन्छ भन्ने अझै स्पष्ट भइसकेको छैन। (एपी)
