काठमाडौं। स्वास्थ्य बीमा कार्यक्रममा आबद्ध नागरिकले कडा रोगको उपचारमा अब दुई लाख रुपैयाँसम्मको उपचार सुविधा पाउने भएका छन्।
स्वास्थ्यमन्त्री प्रदीप पौडेलले ८ प्रकारका बिरामीले साउन १ गतेदेखि दुई लाख रुपैयाँसम्मको उपचार सुविधा पाउने बताएका छन्।
स्वास्थ्य बीमा अन्तर्गत हाल एक लाख रुपैयाँको उपचार सुविधा दिइंदै आएकामा साउन १ देखि ८ प्रकारका रोग लाग लागेका बिरामीको हकमा सुविधा रकम बढाइएको हो।
‘कडा रोग लागेर स्वास्थ्य उपचारका लागि खर्च जुटाउन नसकेर समस्या भोगिरहेका नागरिकको पीडामा राहत दिने सोचका साथ साउन १ गतेबाट ८ प्रकारका बिरामीले हाम्रो पूर्वप्रतिबद्धता अनुसार स्वास्थ्य बीमा कार्यक्रममार्फत २ लाखको उपचार प्राप्त गर्ने व्यवस्था गरेका छौं,’ मन्त्री पौडेलले सामाजिक सञ्जालमार्फत भनेका छन्।
उनका अनुसार क्यान्सर, मुटु, मृगौला, हेड इन्जुरी, स्पाइनल इन्जुरी, सिकलसेल एनिमिया, पार्किन्सोनिजम र अल्जाइमरका बिरामीले दुई लाख रुपैयाँको उपचार सुविधा पाउनेछन्।
