काठमाडौं। बैंकको ब्याजदर उकालो नलाग्दा मुद्दती निक्षेप सामूहिक लगानी कोष (म्यचुअल फण्ड)को रोजाइमै पर्न छोडेको छ। सेयर बजारमा ठूला संस्थागत लगानीकर्ताको रुपमा रहेका म्यचुअल फण्डले लगानी त्यतैतिर बढाएका छन्।

बन्द र खुलामुखी ४३ वटा म्युचुअल फण्डले सूचीकृत कम्पनीको सेयरमा चालु वर्ष जेठ मसान्तसम्म ३९ अर्ब ३६ करोड ९७ लाख रुपैयाँ लगानी गरेका छन्।

म्युचुअल फण्डले पछिल्लो एक महिनामा सेयर बजारमा २.३६ प्रतिशतले लगानी बढाएका छन्। उनीहरुले जेठमा सेयर बजारमा ९० करोड ९२ लाख रुपैयाँ लगानी बढाएका हुन्। सेयर बजारमा वैशाखसम्म ४३ वटा म्युचुअल फण्डको लगानी ३८ अर्ब ४६ करोड रुपैयाँ थियो।

बैंकको ब्याजदर घट्दा अधिकांश म्युचुअल फण्डले मुद्दती निक्षेपमा लगानी शून्य बनाएका छन्। वाणिज्य बैंकले निक्षेपमा ४.३७ प्रतिशत ब्याज दिइरहेका छन्। कर्जाकै औसत ब्याजदर ८.११ प्रतिशतमा आएको छ। बैंकहरुको ब्याजदर निरन्तर घटेका कारण म्युचुअल फण्डले मुद्दती लगानी बढाएका छैनन्।

मुद्दती निक्षेपमा २२ वटा म्युचुअल फण्डको लगानी शून्य छ। एनआईसी एसिया सेलेक्ट फण्ड र आरबीबी म्युचुअल फण्डले घटाएका छन्। १८ वटाले स्थिर राखेका छन्।

मुद्दतीमा उनीहरुको कुल लगानी १ अर्ब ६४ करोड रुपैयाँ छ। रिलायबल समृद्ध योजनाले मात्रै मुद्दतीमा जेठमा ७ करोड रुपैयाँ लगानी गरेको छ।

म्युचुअल फण्डका योजना व्यवस्थापकहरु बैंकको ब्याजदर घटेका कारण सेयर बजारमा लगानी बढाएको र मुद्दती निक्षेपमा घटाएको बताउँछन्।

‘बैंकको रेट निकै कम छ। म्युचुअल फण्डहरुले लगानी गर्न अरु क्षेत्र पाएका छैनन्। त्यसैले बजारमा लगानी बढाएका हुन्,’ एनआईएमबि एस क्यापिटलका डीसीइओ सचिन्द्र ढुंगानाले भने, ‘समग्रमा इन्डेक्स बढ्न सकेको छैन। तर, बजारमा सेक्टर मुभ भइरहेको छ। त्यसैले म्युचुअल फण्डको आम्दानी पनि बढेको छ।’

म्युचुअल फण्डको सेयरधितो र मुद्दती निक्षेपमा लगानी रु लाखमा

सेयर बजारमा एनएमबि सरल बचत फण्ड इले सबैभन्दा धेरै २ अर्ब ७९ करोड रुपैयाँ लगानी गरेको छ। रिलायबल समृद्धि योजनाले सबैभन्दा धेरै १८.७५ गुणाले बढाएर १४ करोड ४४ लाख रुपैयाँ लगानी गरेको छ।

३० वटा म्युचुअल फण्डले सेयर बजारमा लगानी बढाएका हुन्। १३ वटाले घटाएका छन्। सिटिजन्स म्युचुअल फण्ड २ ले सेयरमा सबैभन्दा धेरै २६.११ प्रतिशतले लगानी घटाएको छ।

फागुनमा सेयर बजार उकालो लागेर २८९० अंकमा पुगेका बेला आम्दानी गरेका म्युचुअल फण्डहरुले चैत र वैशाखमा नेप्से घट्दा गुमाएका थिए।

नेप्से सूचक अहिले २६३१ विन्दुमा छ। तर, पछिल्ला डेढ महिना हाइड्रोपावर कम्पनीको सेयर मूल्य निकै उचालिएको थियो।

हाइड्रोपावर क्षेत्रका कम्पनी लामो समयदेखि उच्च कारोबार हुने कम्पनीको सूचीमा छन्। मूल्य वृद्धि हुने कम्पनीको सूचीमा पनि हाइड्रोपावर नै छन्।

जेठसम्म म्युचुअल फण्डको बैंक मौज्दात ७ अर्ब ४२ करोड रुपैयाँ छ। वैशाखसम्म यस्तो रकम ६ अर्ब ६७ करोड रुपैयाँ थियो।

२४ वटाको बैंक मौज्दात बढेको छ भने १८ वटाको घटेको छ। म्युचुअल फण्डले जति बेला पनि लगानी गर्न रकम बैंक मौज्दातमा राख्ने गरेको योजना व्यवस्थापकहरु बताउँछन्।

म्युचुअल फण्डको बैंक मौज्दात र न्याभ

जेठमा म्युचुअल फण्डको आम्दानी बढेका कारण खुद सम्पत्तिको मूल्य बढेको हो। ३४ वटा म्युचुअल फण्डको न्याभ बढेको छ। अधिकांशको न्याभ अंकित मूल्यभन्दा बढी छ। ८ वटाको मात्रै घटेको छ।

‘बजारमा बैंकिङ र इन्स्योरेन्स सेक्टर चलेको छैन। बैंकको सेयरमा लगानी गरेर म्युचुअल फण्डलाई फाइदा पनि छैन। त्यसैले अहिले हाइड्रोपावरको मूल्य बढेका कारण म्युचुअल फण्डको नाफा बढेको छ,’ एक मर्चेन्ट बैंकरले बताए।