म्याग्दी। चालु आर्थिक वर्षमा बेनी नगरपालिकाले सबैभन्दा बढी बजेट विनियोजन गरेको बेनी-अर्थुङ्गे-तोरीपानी-पाखापानी सडक आयोजना लक्ष्यभन्दा ३ महिनाअघि सम्पन्न भएको छ।
संघीय सरकारको १ करोड ५० लाख रुपैयाँ समपूरक अनुदान र बेनी नगरपालिकाको १ करोड ५० लाख रुपैयाँ बजेट विनियोजनमार्फत उक्त सडक बेनी-५, ६, ९, १० र रघुगङ्गा गाउँपालिका-५, ६ र ८ नम्बर वडा केन्द्रित हुनेगरी प्राथमिकतामा परेको आयोजना हो।
बजेट अभाव, आर्थिक संकट, निर्माण सामग्रीको मूल्य वृद्धि, सामाजिक लगायत समस्या देखाएर कतिपय आयोजनाका काममा ढिलासुस्ती भइरहेको अवस्थामा बेनी-अर्थुङ्गे-तोरीपानी खण्डमा निर्माण कम्पनीले ६ महिनामा सम्पन्न गर्ने लक्ष्य राखेकामा ३ महिनामा सम्पन्न भएको जनाएको छ।
गत पुस १९ गते २ करोड ९ लाखमा विकेश-दुप्चेश्वर-सुभम् जेभीले ठेक्का सम्झौता गरेको आयोजना आगामी असार २५ गतेभित्र सम्पन्न गर्ने लक्ष्य राखिएको थियो। बेनी नगरपालिकाको अनुगमन समितिका संयोजकसमेत रहेकी उपप्रमुख ज्योती लामिछानेको नेतृत्वमा स्थानीय जनप्रतिनिधि, प्राविधिक, कर्मचारी सहभागी टोलीले मंगलबार आयोजनाको अनुगमन गरेको थियो।
‘निर्माण कम्पनीले सम्झौता अनुसार परिणाममा सडक स्तरोन्नतिका लागि संरचना निर्माण गरेको छ,’ उपप्रमुख लामिछानेले भनिन्, ‘सडक र नालीमा ढलान उपकरणको सहायताले गरिएको हो। यसको नमुना परीक्षण गर्दा गुणस्तरीय सामग्रीको प्रयोग गरेर काम भएको पाएका छौँ।’
पहिलो चरणको ठेक्काबाट बचेको २० लाख रुपैयाँ रकम बराबरको थप काम गर्न हालै ठेक्का आह्वान गरिएको नगर उपप्रमुख लामिछानेले जानकारी दिइन्।
उक्त आयोजनामार्फत बेनी-पाखापानी सडकको प्रवेशबिन्दु, रातोपहिरो, गिठिनी र बेनी नगरपालिका-९ र १० को सिमाना पात्लेखेतमा ९ सय ८ मिटर सडकलाई भित्ता काट्ने, पहिरो पन्छाएर फराकिलो पार्ने, टेवा पर्खाल र नाली निर्माण गरेर ढलान लगाउने लगायत काम भएको नगरपालिकाका इञ्जिनियर सुदीप गौतमले जानकारी दिए। उनका अनुसार ढलान, नाली, ग्याबियन जाली भर्ने, पलम र मेसिनरी पर्खाल निर्माण भएपछि सडक यात्रा सहज र सुरक्षित भएको छ।
निर्माण कम्पनीका संचालक सुवासचन्द्र कार्कीले सम्झौतालगत्तै पर्याप्त मजदुर परिचालन गर्नुका साथै आवश्यकता अनुसार उपकरण र निर्माण सामग्री व्यवस्थापन गरेर लक्ष्य अघि काम सम्पन्न गरेको इञ्जिनियर गौतमले उल्लेख गरे। तत्कालीन जिल्ला विकास समितिले विसं २०५६ मा ट्रयाक खोलेको यो सडकको बेनीबाट अर्थुङ्गे हुँदै किराखोरसम्म नगरपालिकामार्फत करिब ६ किलोमिटर ढलान र कालोपत्र भएको छ।
किराखोरबाट नेप्टचौर हुँदै तोरीपानीको गलेश्वर माविसम्मको ४ किमी सडक स्तरोन्नतिका लागि प्रदेश सरकारको बजेटमा पूर्वाधार विकासका कार्यालयले गत वर्षदेखि आयोजना संचालन गरिरहेको छ।
नेप्टेचौरको वडा कार्यालयबाट गिठिनी हुँदै पात्लेखेततर्फको बेनी पाखापानी सडकको वैकल्पिक खण्डमा बेनी नगरपालिकाले स्तरोन्नति गर्न थालेको नगरप्रमुख सुरत केसीले जानकारी दिए। उनले जिल्लाको प्राथमिकतामा परेको बेनी-पाखापानी सडक आयोजनालाई प्रभावकारी रूपमा कार्यान्वयन गर्न सहजीकरण र समन्वय गरिएको बताए। रासस
