काठमाडौं। काठमाडौंमा एपीटी वायरलेस ग्रुपको ३४औं बैठक (एडब्लुजी-३४) सुरु भएको छ। एसिया प्यासिफिक टेलिकम्युनिटी (एपीटी)ले सञ्चार तथा सूचना प्रविधि मन्त्रालय र नेपाल दूरसञ्चार प्राधिकरणको सहकार्यमा सोमबारदेखि एपीटी वायरलेस ग्रुपको ३४औं बैठक सुरु भएको हो।
कार्यक्रममा बोल्दै सञ्चार तथा सूचना प्रविधि मन्त्री पृथ्वीसुब्बा गुरुङले डिजिटल रुपान्तरणका लागि वायरलेस प्रविधि जग भएको बताए। नेपाललाई दक्षिण एसियाको डिजिटल एवम् सूचना प्रविधिको हब बनाउन एपीटी वायरलेस ग्रुप महत्त्वपूर्ण प्ल्याटफर्म रहेको उनले उल्लेख गरे। बैठकले डिजिटल डिभाइड न्यूनीकरण गर्दै समान कनेक्टिभिटी तयार गर्न नेपालसहितका देशलाई फलदायी हुने उनले जानकारी दिए।
‘फाइभजीको व्यावसायिक रोलआउटसहितका विषयमा बैठकले संवेदनशील सुझाव पाउनेमा विश्वस्त छु। सेटलाइट कम्युनिकेसनसहित इन्टरनेट अफ थिङ्स, स्पेक्ट्रम हार्मोनाइजेसन, फ्रिक्वेन्सीको वैज्ञानिक उपयोगले लगानीको प्रतिफल पाउने दिशामा अघि बढ्नुपर्नेछ। बैठकले मोबाइल प्रविधिको भविष्यलाई थप परिस्कृत गराउन सहयोग पुर्याउने अपेक्षा लिएको छु,’ गुरुङले भने।
यस्तै, प्राधिकरणका अध्यक्ष भूपेन्द्र भण्डारीले एपीटी वायरलेस ग्रुपले स्पेक्ट्रम व्यवस्थापन, नेक्स्ट जेनेरेसन वायरलेस प्रविधि, फाइभजी/सिक्सजीका साथै ग्रामीण र सुगम भेगमा देखिएको कनेक्टिभिटी ग्यापलाई कम गर्न महत्त्वपूर्ण प्ल्याटफर्म भएको बताए। नेपाली प्रयोगकर्ताहरु फाइभजीको व्यावसायिक प्रयोगका लागि आतुर रहेको उल्लेख गर्दै भण्डारीले टेलिकम अपरेटरहरुको घट्दो आम्दानी, भौगोलिक बनावट र डिजिटल डिभाइडका कारण फाइभजी रोलआउटमा चुनौती थपिएको बताए।
यस्ता चुनौतीलाई न्यूनीकरण गर्न प्राधिकरण दूरसञ्चारसम्बन्धी नीति तथा कानुनहरुलाई समयसापेक्ष बनाउने दिशामा अघि बढिरहेको उनको भनाइ छ। उनले काठमाडौंमा सुरु भएको एपीटी वायरलेस ग्रुपको ३४औं बैठकले यस क्षेत्रको दूरसञ्चार विस्तार तथा चुनौती सुधार गर्न सहयोगी भूमिका खेल्ने बताउँदै प्राधिकरण एपीटीसँग सधैं सहकार्यका लागि तयार रहेको जानकारी दिए।
उदाउँदो डिजिटल प्रविधिका आवश्यकता पूर्ति गर्न एडब्लुजी-३४ ले वायरलेस प्रणालीबारे विभिन्न छलफल भइरहेको छ। यसका साथै बैठकमा प्रभावकारी रेडियो कम्युनिकेसन सोलुसन्सका साथै प्रविधि तथा ज्ञानको सहज आदानप्रदान गर्ने उद्देश्य छ।
एपीटीमा एसिया-प्रशान्त क्षेत्रका ३८ देशका दूरसञ्चार हेर्ने सरकारी संस्था सदस्य छन्। यी देशहरुका झण्डै ४ सय प्रतिनिधि बैठकमा सहभागी हुन काठमाडौंमा छन्।
संयुक्त राष्ट्र संघअन्तर्गतको एसिया र प्रशान्त क्षेत्र हेर्ने आर्थिक तथा सामाजिक आयोग (युनेस्क्याप) र अन्तर्राष्ट्रिय दूरसञ्चार संघ (आइटीयू)को संयुक्त पहलमा एपीटी गठन भएको हो। सञ्चार तथा सूचना प्रविधि मन्त्रालय सन् १९७९ जुलाई १ देखि एपीटीको सदस्य रहँदै आएको छ।
