काठमाडौं। एनसेलले प्रिपेड सेवा ‘सधैं अन रिन्यूअल प्याक’ सञ्चालनमा ल्याएको छ। सधैं अन प्याकको सफलतापछि रिन्यूअल प्याकहरुमार्फत प्रयोगकर्ताहरुले बिना कुनै बाधा महिनाभरका लागि बजेटअनुसार विभिन्न अनलिमिटेड सेवाहरुको फाइदा लिन सक्ने कम्पनीले जनाएको छ।
रिन्यूअल प्याकको उद्देश्य नेपाली ग्राहकहरूलाई तुलनात्मक रुपमा महँगो पर्ने पे एज यू गो र बारम्बार लिनुपर्ने स-साना प्याकहरु प्रतिको निर्भरता हटाएर सधैं अन अर्थात् कनेक्टेड रहन सहयोग पुग्ने अपेक्षा गरिएको छ। यी प्याकहरूको मुख्य विशेषता भनेको प्रयोग हुन बाँकी डेटा, टकटाइम र एसएमएस खेर जाँदैन। यसको अर्थ त्यस्ता सेवा, सुविधाहरु अर्को महिनाका सेवा, सुविधाहरुमा थप हुने व्यवस्था गरिएको कम्पनीले जनाएको छ।
यी प्याकलाई सजिलै एनसेल एपमार्फत वा *१२३*९# डायल गरेर, वा नजिकको एनसेल रिटेलर स्टोर अर्थात् प्वाइन्ट अफ सेल्समा गएर खरिद गर्न सकिन्छ।
सधैं अन रिन्यूअल प्याक अर्थात हरेक महिना ३० दिनमा नवीकरण हुने यी प्याकहरुमा ग्राहकले पुरै एक महिनाको समयसीमासहित सेवा पहुँचबाट फाइदा लिन सक्ने कम्पनीले जनाएको छ।
यसमा साधारण सधैं अन प्याकको २८ दिनभन्दा थप दुई दिन बढीको समयावधि रहेको छ। यी प्याकहरूमा यूट्युबमा अनलिमिटेड भिडियो स्ट्रिमिङ सुविधा, रातको समयमा इन्टरनेट ब्राउजिङ तथा विभिन्न सामग्रीहरु डाउनलोड गर्न अनलिमिटेड नाइट डेटाको सुविधा रहेको कम्पनीले जनाएको छ।
‘आजको डिजिटल परिप्रेक्ष्यमा, सहज कनेक्टिभिटी कार्यलयदेखि व्यक्तिगत कार्यहरु, शिक्षा, मनोरञ्जन र सोसल मिडियामा अन्तरक्रियालगायतका लागि अत्यन्त आवश्यक छ। सधैं अन रिन्यूअल प्याकहरू उच्च गतिको इन्टरनेट र निरन्तर सेवाको बढ्दो मागलाई पूरा गर्ने उद्देश्यले ध्यानपूर्वक डिजाइन गरिएको छ। जसले ग्राहकहरूलाई कुनै पनि अवरोध बिना कनेक्टेड रहन सहयोग गर्छ,’ एनसेलका चीफ कमर्सियल अफिसर उमेर मोहसिनले भने, ‘यी प्याकहरूले अत्यन्तै सुलभ शुल्कमा अनलिमिटेड कल, सहज, निरन्तर डेटामा पहुँच प्रदान गर्दछ।’
रिन्यूअल प्याकअन्तर्गत एनसेलले बेस्ट रिन्यूअल प्याक, अनलिमिटेड प्याक र अन्य भ्वाइस र डेटा रिन्यूअल गरि तीन प्रकारका प्याकहरू सञ्चालनमा ल्याएको छ। पहिलो बेस्ट अन्तर्गत करसहित मासिक ३९९, ४९९ र ५९९ रुपैयाँका प्याकहरु रहेको एनसेलले जनाएको छ।
यसमा भ्वाइस, डेटा, र एसएमएस साथै अनलिमिटेड यूट्युव, अनलिमिटेड नाइट डेटा समावेश छन्। प्याकअनुसार यसमा ग्राहकहरूले ८ जीबीदेखि २० जीबीसम्मको डेटा, ३९९ देखि ५९९ मिनेटसम्मको अल नेपाल टक टाइम र ३९ देखि ५९ वटा अल नेपाल एसएमएस पाउनेछन्।
दोस्रोमा अनलिमिटेड रिन्यूअल प्याक अन्तर्गत करसहित ७९९, ९९९ र १४९९ रुपैयाँका प्याक छन्। यी प्याकहरुमा ग्राहकले कुनैपनि नेपाली नेटवर्कमा कल गर्न सकिने अनलिमिटेड अल नेपाल टकटाइम, अनलिमिटेड यूट्युब, अनलिमिटेड नाइट डेटाका साथै प्याकअनुसार ३० जीबीदेखि १०० जीबीसम्मको डेटा र ७९ देखि १४९ वटा अननेपाल एसएमएस पाउने कम्पनीले जनाएको छ।
त्यसैगरी, तेस्रो रिन्यूअल सेवा अन्तर्गत डेटा र भ्वाइसमात्र पाइने प्याकहरु छन्। उदाहरणका लागि एनसेलका १९९ देखि ४४९ रुपैयाँसम्मका भ्वाइस छन्। त्यसैगरी, डेटामा २९९ रुपैयाँबाट सुरु हुने प्याक समावेश छन्।
