काठमाडौं । बैंकहरुले गत वर्षको वित्तीय विवरण सार्वजनिक गरेका छन्। नाफा उच्च दरले घट्छ भनिए पनि अधिकांशको अवस्था भने त्यस्तो देखिएको छैन।

लगातारको दुई वर्षको मन्दीले खराब ऋण बढेको, नोक्शानी व्यवस्थापन खर्च वृद्धि भएको लगायतका कारण देखाउँदै बैंकहरुले उच्च दरले नाफा घट्ने बताइरहेका थिए।

यद्यपि, केही बैंकबाहेक बाँकी बैंकको नाफा बढेको छ। केही बैंकको नाफा त उच्च दरले सुधार भएको देखिन्छ।

नबिल बैंक एक्लैले सात अर्ब ६ करोड नाफा गरेको छ। पोहोर कमजोर ‘पर्फर्मेन्स’ देखाएको प्रभु बैंकले पनि यसपाली राम्रो ‘कमब्याक’ गरेको छ।

सरकारी नेपाल बैंक, विदेशी संयुक्त लगानीको स्ट्यान्डर्ड चार्टर्ड, एनएमबि, सानिमा, एनआइसी एसिया र सिटिजन्सको नाफा घटेको छ। पोहोर कमजोर ‘पर्फर्मेन्स’ दिएका बैंकहरुले यसपाली राम्रो गरेका छन्। खासगरी मर्जरबाट थलिएका बैंकहरुले यसपाली राम्रो सुधार गरेका हुन्।