हेटौंडाका उद्योगको उत्पादन ४० प्रतिशतमा सीमित, उत्पादित सामाग्रीले बजार पाएन

बिजमाण्डू
२०८० चैत्र ३० गते ०९:३३ | Apr 12, 2024
हेटौंडाका उद्योगको उत्पादन ४० प्रतिशतमा सीमित, उत्पादित सामाग्रीले बजार पाएन
हेटौंडा बजार । फाइल फोटो

काठमाडौं । हेटौंडा औद्योगिक क्षेत्रका उद्योगबाट उत्पादित सामग्री अपेक्षाकृत बिक्री नहुँदा संचालनमा समस्या भएको छ। कच्चा पदार्थ अभाव, लागत वृद्धि तथा बैंकको ब्याजले ती उद्योगको उत्पादन ४० प्रतिशतमा सीमित भएको छ।

Tata
GBIME
Nepal Life

हाल उक्त औद्योगिक क्षेत्रमा ११५ उद्योग संचालनमा छन्। ती उद्योग अहिले ४० प्रतिशत क्षमतामा संचलन भइरहेका औद्योगिक क्षेत्र व्यवस्थापन कार्यालयले जनाएको छ।

एक दिनमा तीनवटा गरेर चल्ने उद्योग हाल भने एक सत्रमा मात्र संचालन भइरहेको छ। उद्योग क्षमताअनुसार संचालन हुन नसक्दा मजदुर तथा कर्मचारी कटौतीमा परेका छन्।

उक्त कार्यालयका प्रमुख भोजराज बिराडीका अनुसार कोरोना भाइरस महामारीपछि परेको आर्थिक तथा व्यावसायिक मन्दीको प्रभाव यहाँका उद्योगमा परेको छ। आर्थिक मन्दीले संचालन नभएका दुई दर्जन उद्योगको सम्झौता खारेज प्रक्रिया सुरु गरिएको छ। 

कार्यालयका प्रमुख बिराडीले सम्झौता गर्ने एवं जमिन ओगट्ने काममात्र भएको तर उद्योग संचालन नभएकाले कारबाही प्रक्रिया अगाडि बढाइएको बताए। केही उद्योगको सम्झौता खारेज गर्दा कार्यालयविरुद्ध जिल्ला अदालतमा मुद्दा दायर पनि भएका उनले बताए।

औद्योगिक क्षेत्रमा स्थापना भएका १४७ मध्ये ११५ वटा विभिन्न प्रकृतिका उत्पादनमूलक उद्योग संचालनमा छन्। नौवटा उद्योग बन्द भएका तथा २३ वटा निर्माणाधीन  छन्।

उद्योगको अवस्था दयनीय भएकाले भाडा तिर्न समस्या परेको उद्योगीहरूको गुनासो छ। यहाँ संचालित उद्योगबाट उत्पादित सामग्रीको लागत धेरै हुनु, उत्पादित सामग्री बिक्री नहुनु तथा आर्थिक मन्दीले उद्योगहरूको अवस्था नाजुक भएको उद्योग वाणिज्य संघका पदाधिकारीहरू बताउँछन्।

‘अहिले मन्दी छ, पसल खाली हुँदै गएका छन्। उत्पादित सामान बिक्री हुँदैनन्, यो गम्भीर समस्या हो। उद्योगका लागि बैंकबाट लिएको ऋणको ब्याजसमेत तिर्न समस्या भएको र उद्योगमा थप लगानी गर्न बैंकले ऋण दिँदैन,’ हेटौँडाका फर्निचर उद्योगी रामपुकार ठाकुरले भने।

औद्योगिक क्षेत्रमा निर्माण सामाग्री उद्योग पाँच, प्लाष्टिक सामग्री उद्योग २८, विद्युतीय सामग्री उद्योग तीन, खाद्यान्न तथा पेय पदार्थ उद्योग ११, फर्निचर सामग्री उद्योग छवटा, इन्जिनीयरिङ सेवातर्फ १५, प्याकेजिङ सामग्रीतर्फ पाँच, केमिकल सामग्रीतर्फ  ११, पोल्ट्री तथा दाना उद्योगतर्फ दुई, टेक्सटायल उद्योगतर्फ एक, खानीजन्य उद्योगतर्फ तीन र अन्य उद्योगतर्फ १० वटा उद्योग छन्।

यी उद्योगहरुमा पाँच हजार मजदुरले रोजगारी पाएका छन्। विसं २०२० मा स्थापना भएको औद्योगिक क्षेत्र तीन हजार २२८ रोपनीमा फैलिएको छ।