काठमाडौं। टीभीएस ब्राण्डका सवारीसाधन एसेम्बल गर्ने शंकर समूहको जगदम्बा अटो ग्रुपको कारोबार ६९ करोड रुपैयाँले घटेको छ। सन् २०२२/२३ मा कम्पनीले २ अर्ब ७३ करोडको कारोबार गरेको छ। जबकि अघिल्लो वर्ष २०२१/२२ मा कम्पनीको व्यापार ३ अर्ब ४२ करोड रुपैयाँ थियो। सन् २०२०/२१ मा कम्पनीले ७३ करोड २० लाख रुपैयाँको कारोबार गरेको थियो।
कम्पनीले सन् २०२१ देखि एसेम्बी उद्योग सञ्चालनमा ल्याएको थियो। उद्योगले दुई पांग्रे र तीन पांग्रे सवारीसाधन एसेम्बल गर्छ। पछिल्लो समय दुई पांग्रे सवारीसाधनको बिक्री घट्दै गइरहेको छ। ठूलो संख्यामा युवा पुस्ता विदेशिंदा दुई पांग्रे सवारीसाधनको खपत घट्दै गएको हो।
कम्पनीले १ अर्ब ६० करोड रुपैयाँको बैंकिङ कर्जाका लागि इन्फोमेरिक्स नेपालबाट रेटिङ पुन: पुष्टि गराएको छ। ४३ करोड २५ लाख रुपैयाँको दीर्घकालीन कर्जाका लागि आइआरएन डबल बी प्लस र १ अर्ब १७ करोड रुपैयाँको अल्पकालीन कर्जाका लागि आइआरएन ए फोर प्लस रेटिङ पुन: पुष्टि भएको छ।
