काठमाडौं । धौगलमा रहेको पाटन हाउसमा अहिले ‘लिभिङ इन द मिस्ट’ फोटो प्रदर्शन भइरहेको छ। किशोर शर्माले खिचेका तस्विरहरु अहिले प्रदर्शनीमा राखिएका हुन्।
असोज २४ गते एक कार्यक्रमबीच ‘लिभिङ इन द मिस्ट’ किताब सार्वजनिक गरिएको थियो। त्यही किताबमा रहेका तस्विरहरु अहिले प्रदर्शनीमा राखिएका हुन्।
किशोर शर्माको यो पुस्तकमा राउटे समुदायको कथा छ। किशोर शर्माले सन् २०११ देखि राउटे समुदायलाई भेट्दै फोटोग्राफी गर्दै आएका छन्। राउटे समुदायको जीवनशैलीलाई १२ वर्षदेखि तस्विरमा उतार्ने उनले प्रयास गरिरहेका थिए। अहिले त्यही तस्विरहरु समेटेर ‘फोटो बुक’ निकालिएको हो।
‘यो फोटो पुस्तकले मेरो फोटोग्राफी यात्राको उतारचढाव देखेको, भोगेको छ। यस पुस्तकका मुख्य पात्र राउटे समुदाय र उनीहरुको संघर्षलाई दस्तावेजीकरण गर्ने मेरो प्रयास हो। १२ वर्ष देखिको मेरो प्रयास आज यथार्थमा परिणत भइरहेको देख्दा म भावविहोर त भएको छु नै, सँगै यसले राउटे समुदायका बारेमा भइरहेका र हुने संवादहरूमा टेवा पुर्याउने छ भन्नेमा पनि म निकै आशावादी छु,’ शर्माले भने।
प्रदर्शनी मंसिर ११ गतेसम्म जारी रहने छ। प्रदर्शनी सोमबार तथा दशैं र तिहारका अवधिमा बन्द रहने छ ।
