काठमाडौं । नेपालगंजस्थित जमुनाह नाकामा सीमावर्ती भारतीय बजार रुपेडिहा जाने नेपाली उपभोक्ताको लर्को लागेको छ।
नेपालगंज भन्सार कार्यालयले एक सय रुपैयाँभन्दा बढीको सामान ल्याउदा भन्सार तिर्नुपर्ने गरी कडाइ गरे पनि घरायसी उपभोगका सामानसँगै चाडपर्वका लागि आवश्यक पर्ने खाद्यान्न र लत्ताकपडा खरिदका लागि दैनिक हजारौंको संख्यामा नेपाली रुपेडिहा पुग्ने गरेका हुन्।
अहिले प्रत्येक दिन १० हजारभन्दा बढी नेपाली जमुनाह नाका हुँदै रुपेडिहामा जाने गरेको जमुनाहस्थित इलाका प्रहरी कार्यालयका प्रमुख प्रहरी निरीक्षक मीनबहादुर विष्टले बताए।
‘शुक्रबार र शनिबार सीमामा थामिनसक्नु भीड लाग्ने गरेको छ’, उनले भने, ‘सहजरुपमा आवतजावतको लागि हरदम प्रयास गरिरहेका छौं।’
तीजको किनमेल गर्न रुपेडिहामा नेपाली उपभोक्ताको लर्को लागेपछि यतिबेला नेपालगंजका व्यापारी चिन्तित् छन्। बाँकेका ग्रामीण क्षेत्र र बर्दिया, दाङ, सुर्खेत, दैलेख, जाजरकोट र सल्यानलगायत स्थानका उपभोक्तासमेत किनमेलका लागि भारत जाने गरेका छन्।
रुपेडिहामा नेपाली रुपैयाँमा कारोबार हुने गरेको स्थानीय बताउँछन्। व्यापारीले पसलमा काम गर्ने कामदारसमेत नेपालीलाई राखेर भाषाका लागि सहज बनाएका छन्। नेपाली उपभोक्ताको भरमा रुपेडिहा बजार चलेको स्थानीय सन्तोष शुक्लाले बताए।
तीज आउन केही दिन बाँकी रहे पनि नेपालगंज बजार भने सुनसान छ। बजारमा उपभोक्ताको चहलपहल कम छ तर सीमा पारी भारतीय बजार रूपेडिहामा किनमेल गर्ने नेपाली उपभोक्ताको चहलपहल बढेको छ।
चाडपर्व मात्र होइन, अन्य समयमा पनि दैनिक उपभोग्य सामग्रीका लागि नेपाली उपभोक्ता भारतीय बजार रूपेडिहामै निर्भर रहने गरेको नेपालगंज उद्योग वाणिज्य संघका पूर्वअध्यक्ष कृष्णप्रसाद श्रेष्ठले बताए।
रुपेडिहा बजार नेपाली उपभोक्ताको भरमा टिकेको छ। दैनिक करिब एक करोड रुपैयाँको कारोबार नेपाली उपभोक्ताबाटै हुने गरेको व्यापारी बताउँछन्।
दैनिक उपभोग्य सामान, तरकारीलगायत वस्तु किन्न सयौं नेपाली सीमा पार जान्छन्। नेपालगंजमा चाडपर्वको बेलामा पनि कारोबारमा कमी आएको श्रेष्ठको भनाइ थियो। नेपाली उपभोक्ता भारतीय बजार किनमेलका लागि जाने परम्परा पुरानै भएकाले उनीहरूलाई नेपालगंजमै रोक्न नेपालगंज उद्योग वाणिज्य संघको प्रत्येक निर्वाचनका बेला चुनावी नारा बन्ने गरे पनि निर्वाचनपछि सेलाउँदै जाने गरेको छ।
‘हामीले संघको तर्फबाट धेरै प्रयास गरेका छौं। हाम्रो मात्रै प्रयासले केही हुनसकेको छैन। सस्तो पाइने लोभमा नेपाली उपभोक्ता रुपेडिहा जाने चलनले नेपालगंजका व्यवसायी धराशायी भएका छन्।
‘हामीले बेला बेलामा उपभोक्ता जागरण कार्यक्रम गरेर सम्झाउने काम गरेका छौं’,संघका अध्यक्ष अब्दुल वाहिद मन्सुरीले भने, ‘भारतीय बजारमा सबै सामान सस्तो पाइन्छ भन्ने भ्रम नेपाली उपभोक्तामा हट्न सकेको छैन।’
पछिल्लो एक सातायता किनमेल गर्न रुपेडिहातर्फ जाने नेपाली उपभोक्ताको भीड बढेको जमुनाहस्थित इलाका प्रहरी कार्यालयका प्रमुख वरिष्ठ प्रहरी नायब निरीक्षक माधव रिजालले बताए।
उनका अनुसार दैनिक करिब दुई-तीन सय नेपाली उपभोक्ता किनमेलका लागि रुपेडिहा जाने गरेका छन्। घरायसी प्रयोजनका सामान किन्न सीमावर्ती बजारतिर धाउने सीमा क्षेत्रका स्थानीयवासीसँगै चाडपर्वका बेला टाढाटाढाबाट पनि नेपाली उपभोक्ता रुपेडिहा जाने गर्दछन्।
घर रङ्गरोगनदेखि विद्युतीय सामग्री, मसला, फलफूल र लत्ताकपडा प्रायजसोले रुपेडिहाबाटै खरिद गरेर ल्याउने गरिन्छ। रासस
