सरकारले तीन सातामै चौथोपटक आन्तरिक ऋण उठाउँदै, १० अर्बको ऋणपत्र आइतबार जारी गरिंदै

बिजमाण्डू
२०८० भदौ ९ गते १६:०६ | Aug 26, 2023
सरकारले तीन सातामै चौथोपटक आन्तरिक ऋण उठाउँदै, १० अर्बको ऋणपत्र आइतबार जारी गरिंदै

काठमाडौं। सरकारले तीन साताको अवधिमै चौथो पटक आन्तरिक ऋण उठाउन लागेको छ। आन्तरिक ऋण उठाउन नेपाल राष्ट्र बैंकले आइतबार १० अर्ब बराबरको विकास ऋणपत्र जारी गर्दैछ।

Tata
GBIME
Nepal Life

राष्ट्र बैंकले ६ वर्ष अवधिको विकास ऋणपत्र २०८५ ‘ज’ जारी गर्न लागेको हो। बैंक तथा वित्तीय संस्था, गैर–बैंक वित्तीय संस्था, बीमा कम्पनी, संगठित संस्था र सर्वसाधारण नागरिकसमेतले विकास ऋणपत्र खरिद गर्न सक्नेछन्।

ऋणपत्रको ब्याजदर बोलकबोलका माध्यमबाट निर्धारण हुनेछ। आइतबार दिउँसो ३ बजेसम्म बोलकबोल हुने ऋणपत्र भदौ ११ गते निस्कासन हुनेछ।

सरकारले तीन साताको अवधिमै ३५ अर्ब ८५ करोड रुपैयाँ आन्तरिक ऋण उठाउन लागेको हो। यो आर्थिक वर्ष २ खर्ब ४० अर्ब रुपैयाँ आन्तरिक ऋण उठाउने सरकारी लक्ष्य छ। जसअनुरुप साउन १८ र २८ मा १०/१० अर्ब रुपैयाँ तथा साउन ३२ मा ५ अर्ब ८४ करोड रुपैयाँ बराबरको विकास ऋणपत्र जारी भइसकेको छ।