काठमाडौं। वाणिज्य बैंकहरूले गत आर्थिक वर्ष ११ महिनामा ६७ अर्ब २३ करोड रुपैयाँ खुद नाफा कमाएका छन्। जेठ महिनामै बैंकहरूले १० अर्ब रुपैयाँ नाफा बढाएको नेपाल राष्ट्र बैंकले जनाएको छ। गत आर्थिक वर्ष वैशाखसम्म बैंकहरूले ५७ अर्ब १६ करोड रुपैयाँ कमाएका थिए।

बैंकहरुको नाफा अघिल्लो आर्थिक वर्षको ११ महिनाको तुलनामा भने १.७५ प्रतिशत मात्र बढी हो। आर्थिक वर्ष २०७८/७९ को ११ महिनामा बैंकहरुले ६६ अर्ब रुपैयाँ खुद नाफा गरेका थिए।

गत आर्थिक वर्ष जेठसम्म नबिल बैंक एक्लैको नाफा ७ अर्ब ११ करोड रुपैयाँ छ। बढी नाफाका आधारमा ग्लोबल आईएमई बैंक दोस्रो स्थानमा छ। उसले साढे ६ अर्ब रुपैयाँ खुद नाफा गरेको छ।

नेपाल इन्भेष्टमेन्ट मेगा बैंकले ४ अर्ब ७६ करोड, एनआईसी एसिया बैंकले ४ अर्ब ६३ करोड र राष्ट्रिय वाणिज्य बैंकले ४ अर्ब ४७ करोड रुपैयाँ नाफा कमाएका छन्। बाँकी सबैको नाफा ४ अर्बभन्दा कम छ। 

सबैभन्दा कम नाफा कृषि विकास बैंकको छ। उसले १ अर्ब ५६ करोड रुपैयाँ मात्र कमाएको छ। पुछारबाट दोस्रोमा सनराइज बैंक छ । उसले १ अर्ब ५९ करोड नाफा गरेको छ।