काठमाडौं। सोलुखुम्बुमा ८२ मेगावाटको आयोजना थपिने भएको छ। तल्लो सोलु जलविद्युत आयोजना निर्माण गरिने भएको हो।
यो आयोजना सोलु हाइड्रोपावर लिमिटेडले निर्माण गर्न लागेको हो। कम्पनीले अहिले वातावरणीय प्रभाव (इआइए) प्रतिवेदन तयार पारिरहेको छ। सोमबार सार्वजनिक सूचना प्रकाशित गर्दै यही साउन ७ र ८ गते सार्वजनिक सुनुवाई गर्न लागेको उल्लेख गरेको छ।
प्रस्तावित आयोजना सोलुखुम्बुको थुलुङ दुधकोसी गाउँपालिका र सोलुदुधकुण्ड गाउँपालिका भएर बग्ने सोलुखोलामा निर्माण हुनेछ। सोलु खोलाको पानीलाई साल्मे नजिकै ब्यारेजमार्फत वहाब परिवर्तन गरेर ४ वटा गेट भएको इन्टेकमार्फत ४२६० मिटर लम्बाइको सुरुङमार्ग हुँदै सर्ज साफ्टसम्म पुग्नेछ।
विद्युत उत्पादनपछि १५६.४२ मिटर लामो आरसीसी टेलरेस हुदै पुन: सोलु खोलामा पानी खसालिने छ। नेपाल इन्भाइरोन्मेन्टल एण्ड साइन्टिफिक सर्भिसेज प्रालिले आयोजना परामर्शदाताको काम गरिरहेको छ।
