काठमाडौं। रोमिङ लिएर भारतबाट नेपाल टेलिकमको सिममार्फत फोन गर्दा प्रतिमिनेट ३० रुपैयाँ तिर्नुपर्ने बाध्यता हट्ने भएको छ।
लामो गृहकार्यपछि अब प्रतिमिनेट २३ रुपैयाँ घटाएर अब नेपाली सिमबाट फोन गर्दा प्रतिमिनेट ७ रुपैयाँ मात्रै शुल्क निर्धारण गर्ने तयारी भइरहेको सञ्चार तथा सूचना प्रविधि मन्त्रालयका सञ्चार विज्ञ नरेन्द्र केसीले जनाएका छन्।
‘सञ्चारमन्त्री रेखा शर्माको भारत भ्रमणको बेला त्यहाँका नेपालीले उठाएको एउटा माग पुरा भएको छ। नेपालीहरुले रोमिङ सुविधा लिएर अब भारतबाट नेपाल टेलिकमको सिमबाट फोन गर्दा प्रतिमिनेट ७ रुपैयाँ मात्रै शुल्क निर्धारण गरिएको छ। केही दिनपछि यो महसुल लागु गरिने छ,’ केसीले सामाजिक सञ्जालमा लेखेका छन्।
शर्मा गत चैतमा भारत भ्रमणमा गएकी थिइन्। उपचार, शिक्षा, रोजगारी तथा व्यवसायिक प्रयोजनका लागि नेपालीहरु भारत जाने गरेका छन्।
