कोरोनाका कारण कामदार फर्केपछि हुवासिन सिमेन्ट उद्योग निर्माण ठप्प, ५० प्रतिशत काम अझै बाँकी

रासस
२०७७ भदौ ३० गते १२:१७ | Sep 15, 2020
कोरोनाका कारण कामदार फर्केपछि हुवासिन सिमेन्ट उद्योग निर्माण ठप्प, ५० प्रतिशत काम अझै बाँकी


Tata
GBIME
Nepal Life

काठमाडौं। कोरोना भाइरसको संक्रमणका कारण कामदार अभाव भएपछि चिनियाँ लगानीको हुवासिन सिमेन्ट उद्योगको निर्माण प्रभावित भएको छ।

धादिङको बेनिघाट रोराङमा बहुराष्ट्रिय कम्पनी हुवासिन सिमेन्टले निर्माण गर्न लगेको राष्ट्रिय प्राथमिकता प्राप्त उद्योगमा कोरोनाका कारण कामदार अभाव भएपछि दुई महिनायता निर्माण पूर्णरूपमा ठप्प भएको हो। उद्योगमा कार्यरत चिनियाँ कामदार केही चीनमा नै रहेको र उद्योग निर्माणस्थलमा रहेका कामदारसमेत क्रमशः स्वदेश फर्केपछि निर्माण कार्यमात्रै प्रभावित भएको छैन, तोकिएको समयमा उद्योग सञ्चालनमा आउनेमा समेत आशंका पैदा भएको छ।

कामदार अभावका कारण निर्माण कार्य पूर्णरूपमा ठप्प भएको छ। सो उद्योगमा कार्यरत चिनियाँ कामदार फर्केपछि करिब दुई महिनादेखि निर्माण कार्य ठप्प भएको हो। बढ्दो कोरोना संक्रमणको सन्त्रासका कारण प्राविधिकसहितका दक्ष ३०० चिनियाँ र ६०० नेपाली कामदार घर फर्केपछि उद्योगको काम रोकिएको हो।

सो उद्योगमा नेपाली र चिनियाँ गरी कूल एक हजार कामदार कार्यरत थिए। उद्योगको काम रोकिँदा स्थानीयले समेत रोजगारी गुमाएका छन्। दुई महिना अघिसम्म निकै चहलपहल हुने बेनिघाट रोराङ–२ ताल्दी अहिले प्रायः सुनसान छ। व्यवसायका लागि उद्योग वरिपरि स्थानीयले खोलेका पसल तथा होटलमा ग्राहक आउन छाडेपछि स्थानीयसमेत आफ्नो लगानी डुब्ने त्रासमा रहेको उद्योगले जनाएको छ।

कम्पनीले आफ्ना प्राविधिकसहित कामदार नेपाल आउन तयार रहे पनि कोरोनाका कारण नेपाल सरकारले विदेशी कामदार ल्याउन अनुमति दिएको छैन। कम्पनीका आयोजना विकास म्यानेजर डिल्लीराज पोख्रेलले यथासक्य छिटो चिनियाँ प्रविधिकसहितको टोली ल्याउन पहल भइरहेको जानकारी दिए। उनले चिनियाँ कामदार ल्याउनका लागि आवश्यक सहजीकरण गरिदिन सरकारसँग आग्रह गरे। उनले उद्योग परिसरमा कोरोना नियन्त्रणका सबै स्वास्थ्य सुरक्षा मापदण्ड लागू गरिएका कारण जोखिम नरहेको बताए।

उद्योगको भौतिक काम ५० प्रतिशतभन्दा बढी सकिएको छ। उता बेनिघाट रोराङ गाउँपालिकाका अध्यक्ष पित्तबहादुर डल्लाकोटीले उद्योगको काम रोकिँदा स्थानीयले पनि रोजगारीको अवसर गुमाएको र राजस्व संकलनमा समेत ठूलो असर परेकाले उद्योगको काम सुचारु गर्न आवश्यक सहजीकरण गरिदिन केन्द्र सरकारसँग आग्रह गरे। सिमेन्ट उत्पादन तथा सिमेन्टसम्बन्धी प्रविधि विस्तारमा हुवासिन विश्वमै अग्रणी स्थानमा रहेको छ।

हुवासिनले विभिन्न २५ भन्दा बढी मुलुकमा सिमेन्ट उत्पादन गर्दै आएको छ। हुवासिनले करिब चार वर्ष अघि बेनिघाट रोराङ–२ मा रहेको चुनढुंगा खानी ६० करोड तिरेर भाडामा लिएको थियो। जुन मूल्य हालसम्मकै उच्च हो। हुवासिनले दैनिक तीन हजार टन सिमेन्ट उत्पादन गर्ने अनुमति प्राप्त गरेको छ।

लगानी बोर्डले सहजीकरण गरेको सो उद्योग होङ्सी शिवम् पछिको ठूलो विदेशी लगानी हो। उद्योगमा १५ अर्ब लगानी रहेको छ। उद्योगमा चिनियाँ लगानीका स्वदेशी लगानीकर्तामा उद्योगी सुरज वैद्य छन्।