काठमाडौं। डेभलपमेन्ट बैंकर्स एसोसिएसन नेपालको अध्यक्षमा कामना सेवा विकास बैंकका प्रमुख कार्यकारी अधिकृत (सीइओ) दिनेश थकाली सर्वसम्मत चयन भएका छन्। एसोसिएसनको शुक्रबार भएको २१औँ वार्षिक साधारण सभाले थकालीको नेतृत्वमा ९ सदस्यीय नयाँ कार्यसमिति चयन गरेको हो।
नयाँ कार्यसमितिको उपाध्यक्षमा गरिमा विकास बैंकका सीइओ माधव प्रसाद उपाध्याय चयन भएका छन्। सचिवमा ज्योति विकास बैंकका सीइओ कपिल ढकाल र कोषाध्यक्षमा महालक्ष्मी विकास बैंकका सीइओ दिपेश लम्साल चयन भएका छन्।
कार्यसमिति सदस्यमा मुक्तिनाथ विकास बैंकका सीइओ तारा मानन्धर र लुम्बिनी विकास बैंकका सीइओ सुमन आचार्य चयन भएका छन्। त्यस्तै, सांग्रिला डेभलपमेन्ट बैंकका सीइओ रविन सिजापति, ग्रिन डेभलपमेन्ट बैंकका सीइओ हरिबहादुर बुढाथोकी र मितेरी डेभलपमेन्ट बैंकका सीइओ अनन्त कुमार चापागाईं पनि सदस्य चयन भएका छन्।
साधारण सभाले आर्थिक वर्ष २०८२/८३ को वार्षिक प्रतिवेदन पारित गरेको छ। लेखापरीक्षकको प्रतिवेदनसहित वासलात, नाफा-नोक्सान हिसाब र नगद प्रवाह विवरण लगायतका वार्षिक वित्तीय विवरण पनि स्वीकृत गरेको छ।
सभाले आर्थिक वर्ष २०८३/८४ का लागि लेखापरीक्षक नियुक्ति र पारिश्रमिक निर्धारणसम्बन्धी प्रस्तावसमेत पारित गरेको छ। नवनिर्वाचित कार्यसमितिले संस्थागत विकास र बैंकिङ क्षेत्रका साझा मुद्दामा काम गर्ने प्रतिबद्धता जनाएको छ।
नवनिर्वाचित अध्यक्ष थकालीले एसोसिएसनका गतिविधिलाई थप प्रभावकारी बनाउने बताएका छन्। उनले सुशासन, जोखिम व्यवस्थापन, प्रविधि तथा मानव संसाधनको क्षमता अभिवृद्धि र डिजिटल रूपान्तरणलाई प्राथमिकता दिने प्रतिबद्धता व्यक्त गरेका छन्।
उनले बैंकिङ क्षेत्रको सुधार र स्वस्थ प्रतिस्पर्धाका लागि सदस्य बैंकहरूबीच सहकार्य आवश्यक रहेको बताए। विकास बैंकहरूको हित प्रवर्धनका लागि नियामक निकाय र सरोकारवालासँग समन्वय बढाउने उनको भनाइ छ।
हाल नेपालमा राष्ट्रिय स्तरका ७ र क्षेत्रीय स्तरका ९ गरी १६ विकास बैंक सञ्चालनमा छन्। यी बैंकले २०८३ असार मसान्तसम्म १ हजार १११ शाखामार्फत करिब ८० लाख ग्राहकलाई बैंकिङ सेवा उपलब्ध गराउँदै आएका छन्।
